يقصد ((الآن)) وبن طفلة (دون تسميتهما): مفرح الدوسري يبحث للوزير المتقاعد عن عمل بدلا من بيعه اللمبات بإعلانات ((الآن))

الله يالدنيا.. وزير يبيع لمبات؟

 
كتب مفرج الدوسري
 

يا كثر الدكاتره في الديرة، يا كثرهم، عد وخربط، بين كل دكتور ودكتور يطلع لك دكتور، اللي ماخذ الشهادة من الفلبين وهو ما يعرف فلبيني ولا انجليزي، واللي حصل عليها من باكستان وهو ما يتكلم لا اوردو ولا انجليزي، واللي ماخذها من فيتنام وفنزويلا والهند وأوغندا والنيبال وماليزيا وغيرها العشرات، صاروا الدكاتره في الكويت أكثر من العمالة الوافدة، ويا ليت من بعضم بركة والا عندهم نفعة للديرة، شهادة وبس، والاسم دكتور على الفاضي، المفروض الحكومة تتأكد من استحقاق هذا الشخص لهذه الشهادة وهذا المسمى، ما يصير أي واحد يجيب شهادة من أي مكان على طول يصير دكتور، كافي دكاتره طفحت الديرة.
???
المواطن الكويتي من المهد إلى اللحد وهو في عهدة الدولة، يعني مكفول محفول ياكل ويشرب ويلبس ويتعلم ويعالج ويتوظف ويسكن ويتزوج ويمارس حياته الطبيعية ويجيب عيال واحفاد والله لا يغير علينا ولا عليه، يمارس هوايته في تكسير املاك الدولة وفي المعارضة والاحتجاج والصراخ وابداء الرأي والنقد والترشيح والانتخاب ويقول اللي يبيه دون خوف او تردد، عايش في نعيم ومبسوط ومرتاح ولا سائل عن شي، ودي أسأل سؤال وأدري بتقوم قيامة البعض بسببه لكن ما عليه، المواطن الكويتي شقدم للكويت مقابل العز اللي عايش فيه، يعني بطريقة أخرى، الكويت عطتنا كل شيء احنا شقدمنا مقابل هذا العطاء الكبير؟ سؤال ودي اجد له جواب بعيد عن الشتايم والتطاول من قبل جمهور ومشجعي ابو الشرهات اللي يعدون على الأصابع! عطونا جواب بدون شتائم!
???
مسكين ابو الشرهات، يكسر الخاطر، يتمنى لو ترجع الايام ويصير وزير مثل ما كان قبل، انا اعتقد لو يعرضون عليه يعينونه وزير في اي حكومة وفي اي منصب ما يرفض، حتى لو وزير بدون وزارة المهم وزير والسلام، لأنه عايش (لايص) هالايام ما يعرف شلون يتصرف ولا يدري شيسوي، يقولون طفارته اذا احد ذكره بلقب الاسبق، يموت ويجن جنونه، ويقولون بعد حايشه مثل الوسواس، الى درجة انه ما يثق في صاحبه وشريكه في موقع بقالة (ابو الكلام ليمتد)! مسكين، الله يالدنيا عقب ما كان يشق ويخيط صار يحط اعلانات بيع سيارات ودلالة قطع غيار وبيع لمبات، والله الدنيا ما لها أمان، والله الدنيا ما فيها خير، الحين يبيع لمبات والله عيب، أناشد الحكومة تعينه لو مستشار في اي مكان، على الاقل يفتك من هالبهدلة، شدعوة بتشاورونه، مثل ما وزرتوه بالصدفة عينوه مستشار بالصدفة، المهم يكون له مركز حتى لو بدون تأثير!! شفت شلون يا بو الكلام قلبي معاك، قاعد أدور لك وظيفة شتبي بعد؟.
???
الكويت تزخر بالكفاءات والعقول النيرة، وابناؤها البررة يبذلون الجهد لرفعتها وعزتها، وهذا ليس بالأمر المستغرب او الجديد، وما اختيار الدكتور عادل العدواني استاذ نظم المعلومات بجامعة الكويت ليكون ضمن أفضل مئة باحث بالعالم في مجال نظم المعلومات الا نموذج لابناء الكويت المخلصين، ومصدر فخر واعتزاز لنا جميعاً، ويستحق هذا الرجل العصامي التقدير والشكر والثناء على ما قام به من جهود.
???
< نقطة شديدة الوضوح:
جهود وزارة الداخلية واضحة وتستحق الشكر والاشادة، خصوصا ادارة المرور التي يقوم رجالها المخلصون بتأمين البلد وتطهيرها من العابثين بأرواح الناس ومن المستهترين، فكل الشكر لقيادات ادارة المرور

مفرج البرجس الدوسري