المواطنة أبرار الشمري : تعرضت وصديقتي لهجوم بكلب بوليسي وللسب بسبب تواجدنا في شاطيء عام يقع قبالة منزل المعتدي

نشرت المواطنة أبرار الشمري في حسابها في موقع توبتر قصة تعرضها وصديقتها لهجوم عبر كلب بوليسي من قبل مواطن وأسرته بسبب تواجدها في شاطيء عام يقع قبالة منزله .

و تأتي هذه القصة لتسبق ما يتعرض له بعض المواطنين هذه اللحظات من القبض عليهم من قبل وزارة الداخلية بسبب تواجدهم في شاطيء عام يقع قبالة قصور ضخمة في منطقة البدع .

و #جريدة_الآن تنشر تغريدات المواطنة أبرار الشمري كما غردت بها :

- حصل لي ولصديقتي موقف سيء جداً قبل يومين عند شواطىء البدع. من فترة قاعدين نغير جو ونختار مكان مختلف كل مرة نطلع فيها؛ نتمشى عقب ما تغرب الشمس، نبي نشم هوا.  
‏بهذا اليوم رحنا طلبنا اكل من مطعم، خذينا أكلنا معانا ورحنا على احد شواطىء البدع (اللي هو يعتبر من الممتلكات العامة)

- قعدنا جدام البحر، ناكل ونسولف، بنتين قاعدين مو مأذين أحد. سمعنا صوت طفل من دريشة البيت اللي ورانا يقول لنا بالانجليزي go go. سألتني صديقتي تسمعينه؟ قلت لها اي اسمعه، بس هذا شاطىء عام وعموما ما راح اقعد أكلم طفل.
‏كمل صراخ وصار يقول you know عرس؟ we make عرس here. You go go.


- استغربت طبعا.. عرسهم ببيتهم كيفهم؛ بس الشاطىء مو ملكهم، وعموما أتصور أن أزمة الوباء للحين ما انتهت والمفروض محد يسوي عروس هالفترة .. + هالكلام الساعة ٧ ونص بالمساء، يعني ما بقا شي عالحظر.
‏جم دقيقة ولا يطلع نفس الياهل ومعاه جلب بوليسي ضخم وهد الجلب علينا، ركض علينا الجلب مندفع.


- قدرت اوخر الجلب عنا لما قطيت الأكل باتجاه ثاني و لهى الجلب بالأكل.. طبعاً عصبت عالياهل، شلون تهد جلبك علينا؟
‏انصدم ويقول: انتو كويتيين؟
‏يعني كأن عادي ان يسوي هالحركة مع ناس غير كويتيين مثلاً..
‏طلع ريال من البيت، يقول ترى ما نقصد شي، قلنا يمكن عندكم فوبيا من الجلاب ونبيكم تروحون


- متعمدين انهم يبون يخوفونا، وهم اللي قالوا حق الياهل اطلع و هد الجلب عليهم.
‏الريال قال ادري ان هذا شاطىء عام بس احنا نبي نسوي عرس و نبيكم تروحون.
‏رد مسك الجلب، نقول له وخره يقول ما راح اوخره لين تذلفون.
‏بلشوا يسبوننا (الطفل و الريال + حتى اللي داخل البيت من الدريشة) بكلام بذيء

- اقول لهم ولدكم سبنا يقولون اي بعد قلنا لكم تمشون ما رضيتوا. يعني ولدهم قليل أدب ويسبنا جدامهم و عادي.
‏اقول له هذا شاطىء عام يقول لي اي ندري بس نبي نسوي عرس.
‏خير؟ من متى صار مسموح حق الناس انها تحجز الشاطىء حق نفسها وتمنع الآخرين منه؟ ومن متى صار اسلوب التخويف والاهانة عادي؟

- ما اقدر أتصور شلون كان ممكن يكون الموقف لو احنا مو كويتيات. هادين علينا جلب بوليسي شرس لما كانوا معتقدين ان احنا مو كويتيات. وحتى لما عرفوا ان احنا كويتيات ما اختلف الأسلوب، كملوا بالسب والتخويف مع الجلب مالهم