#جريدة_الآن روابي البناي تكتب : فبراير الكويت.. غير

زاوية الكتاب

كتب الآن - القبس 566 مشاهدات 0


القبس
اليوم بصبح عليكم بطريقة اهلنا في دار زايد، الله يحفظهم، بما اني توني راده منهم واقول: صبحكم الله بالخير يا رفاقة الخير، ان شاء الله قضيتوا عطلة خفيفة لطيفة ظريفة استمتعوا فيها ومتعتوا خلق الله اللي حولكم.
طبعا اللي قضى عطلة ونيسة اهو الإنسان الطبيعي اللي يعرف اشلون يحتفل واشلون يستانس من غير لا ينشر اذاه على اللي حوله، اتوقع عقب هالمقدمة الوكاد عرفتوا عن شنو بهذر معاكم اليوم، ايه نعم بهذر عن المهزلة اللي شهدها وطن النهار بيوم عيد ميلاده المجيد من بعض عديمي المسؤولية والاحترام لهذي الديرة اللي لو يحفون ما يلقون ربعها ولا يحلمون انهم يشيلون هويتها، اللي للأسف انهم متشرفين بشيلتها.
شهر فبراير بالكويت له نكهة خاصة ناطعة عند الكويتيين وكل من يقيم عليها وعند اهلنا بالخليج، ربي لا يخلينا منهم اللي انشوفهم امنورينا وامشرفينا، ومتعنين علشان يشاركونا بفرحتنا باحتفالنا بعيد وطن الأوطان، وتطهير وطن النهار من الغزاة العراقيين عقب رحمة ربي سبحانه وتعالى، ولطفه فينا والكفخة السنعه اللي على اصولها من ربعنا الشقران الحمران ومعاهم السمر المماليح، يعني بالمختصر فبراير يعتبر شهر الوناسة والأناسة للكويت واهلها وربعها وكل من يحبها.
بس للأسف اكو تصرفات لبعض المواطنين الله يكافينه شرها واذاها كل سنة عن سنة تتكاثر وتزيد بشكل وايد مخيف ومريع، واتوقع ان هؤلاء عقب هالسنه المفروض انه يدنى زوالها ونفتك منها وما يكون لها وجود كلش، علشان الناس تفتك من شرها، وطبعا القضاء على هؤلاء ماراح يتم إلا باتحاد حكومي نيابي سريع جدا.
أي مجد اللي أصبح هنا؟
اهل الكويت، وارد واحط تريليون خط احمر تحت اهل الكويت كلهم بدون استثناء، قالوا بصوت واحد: واخزياه الله يالفشله من الشي اللي صار يومي 25 و26 فبراير من بعض ملتصقي الكويتنه ومدعي الوطنية والفعايل اللي خلت راسنا بخامس ريولنا، ايه نعم فبعض «الحبربش» اللي للأسف محسوبين علينا كويتيين عبروا عن وناستهم الشخصية اللي المفروض انها ما تتعدى اسوار دورهم في بيوتهم بشكل كلش يفشل وغير اخلاقي ولا ادبي ولا تربوي ولا ثقافي ولا حتى فكاهي اذا البعض ياخذها من جانب الوناسة والأناسة اللي كلش ما اشوفها.
فكلنا شفنا سواء كنا بالكويت ولا خارجها المناظر المخجلة لبعض مرتادى شارع الخليج العربي، وبنيدر والخيران وكل داعوس من دواعيس شوارع وطن النهار والمناكر اللي سووها والأذيه اللي تسببوا فيها لغيرهم من ترشرش مياه وتحذف بالونات فيها صخر وحصم والله يعلم بعد شنو اكو فيها، وترقص على الدنابك والكواسير وتعطيل لمصالح خلق الله وتلوث بصري وضوضائي، هذا غير الله يعزكم الزباله والوصاخة اللي خليتوها ترتع بالشوارع عقبهم، يعني مثل ما يقولون اذيه full package، وما اشوف فيها ريحة الوناسة والاحتفال والتعبير عن الوطنية ويوافقني الكثير من اهل الكويت السنعين اللي اطلبوا مني اكتب هالكلام.
الله سبحانه وتعالى ما شفناه بس عرفناه بالعقل والمنطق، علشان جذي ودي اسأل مدعي الوطنية وملتصقي الكويتنه اللي تحذف بالونات الحصم في شهر فبراير بعض الأسئلة اللي اتمنى القى جوابها عندهم علشان ارتاح ويرتاح مثلي اهل الكويت:
– هل كيف يعقل طال عمركم انكم تحتفلون بمناسبة العيد الوطني لدولة الكويت وتحريرها من الغزو العراقي وانتم اطقون اصبع ورقبتكم يحوشها شد عضلي مزمن عقب هالمسيرات من كثر الرقص والهز على دنابك الاغاني العراقية؟
– هل كيف يعقل انكم اتحبون الكويت ومنهارين من عشقكم لها وانتو تسرحون وتمرحون بأذية خلق الله وتفلعهم ببالونات تارسينها حصم وصخر، واللي للحين ماني لاقيه مبرر حقه، لأن كلش ملش ماني عارفه شنهي العلاقة بين احتفال عيد وطني وبالونات ماي وحصم افلع فيها غيري واذيهم؟
– هل كيف يجوز انكم شايلين علم وطن النهار وترقصون وانتو لابسين باروكة ملك البوب مايكل جاكسون المفلفه ام الوان والحماس واصل اعلى درجة في امبير وطنيتكم على هنا هنا اصبح المجد هنا، على اساس انكم يايبين اليهده ومسوين انجاز عظيم ومشرف يخلي الكويت تفتخر فيكم جدام خلق الله، واخر المتمه كلكم صافين دور عند العيادات اللي رافعه شعار هات عشرتك وكبر مخدتك!
– هل كيف يصير اتغردون بالطير المدلقم عزيزه عزيزه لأنها عزيزه تصونها الجوارح وانتو بكبركم الجارح الأكبر لها بالزباله اللي خليتوها بالشوارع عقبكم والوصاخة اللي ما كلفتوا على عمركم اتشيلونها عقب ما خلصتوا من فقرة الأراغوزات السخيفة السنوية مالتكم؟
– هل كيف ترضون على روحكم انكم اتصيرون نكتة ماصخة وعلج امحزر بحلوج الأكو والماكو بتصرفاتكم الغير مسؤوله ولا تدل على حسن تربية ولا اخلاق ولا حب ولا انتماء لهذا الكيان اللي للأسف انتو محسوبين جزء منه؟
– هل كيف اتغنون احنا عشقناها وعمار ياكويتنا وانا كويتي انا وعاشت لنا الكويت وانتو بس اتحبون الكويت بالكلام وما تدرون عن الفعايل ولا عن طريجها؟
اتمنى اني الاقي اجابة اتخليني انا واهل الكويت السنعين اللي يحبونها فعل مو قول نرتاح ونقدر انحط لكم عذر حتى لو اهو مو مقبول مثل تصرفاتكم علشان ما انتفشل جدام اهلنا وربعنا بالخليج لمن يسألونا.
إسقاط الأراغوزات!
على غرار شعار اخوانه المصريين ايام الثورة، ارفع انا وكل اهل الكويت ممن يسري حب الكويت في عروقهم شعار «إسقاط الأراغوزات »، لأن اهل الكويت ما يعجبهم الحال المايل اللي يسوونه البعض اللي اموقفين شعورهم كأنه عشرين عتوي عافرين فيهم وماسكين ميكروفونات ويحذفون بالونات امغبطة ماي وحصم على خلق الله، لأن اشباه الرياييل اللي سووا هالفعايل ما يمثلون رياييل الكويت السنعة ولا شبابها ولا يهاهيلها، ولا يعجبهم وجود الباصات المتروسة عن بكرة ابيها من هالإبني المترصصين بالبنطلونات والبلوزات الحفر ولايصين ويوههم بالأخضر والأحمر، على اساس الوطنية شاعة من عينهم ويترقصون ويلوفحون بكشيشهم واهم شايلين علم الكويت.
معالي بــوعلي وبوصباح!
العزيز الغالي معالي رئيس مجلس الأمه مرزوق علي الغانم والعزيز الغالي سمو رئيس مجلس الوزراء الشيخ جابر المبارك الحمد الصباح، اليوم بتكلم معاكم مو بصفتي روابي البناي العزيزه عليكم، ويابختي بهالمعزه والقدر، لا بصفتي روابي البناي المواطنة اللي اتمثل اهل الكويت اللي يحبونها فعل مو قول وما يرضون عليها بأدناة الدون ولا يعجبهم الخرابيط ولا البرابيط، احنا كلنا على يقين ان شخوصكم الكريمة مثلنا ويمكن اكثر بحبها وخوفها على الكويت وسمعة الكويت واهل الكويت، علشان جذي اطلب منكم ان يتم تشريع قانون سريع وفوري بمنع مثل هذه الاحتفالات للسنوات القادمة حفاظا على وطن النهار وسمعته، وترشيدا لكميات المياه اللي تهدر في هالأيام بلا مبرر، والأرواح اللي تتعرض للفلعات والإصابات من غير ذنب، وان يشمل هذا القانون وضع خطة خاصة للاحتفالات بالأعياد الوطنية مثل ما كانت بالسابق واحسن، لأن الكويت تستاهل واكو وايد من شباب وبنات الكويت مستعدين يشاركون بهالاحتفالات السنعه اللي كنا متعودين عليها واللي كانت فعلا اتعبر عن عشق وحب الكويتيين لها.
فأتمنى يا بوعلي انك اتشيل اليأس اللي بدا يدبي فينا من وطن النهار عقب اللي شفناه من مدعي الوطنية وفعايلهم، واتمنى يابوصباح انك اتخلينا نرد وانغني ياكويت عزج عزنا يا اغلى اسم في قلوبنا مثل ما سموك دايما اتردد، بإرجاع المسيرات الوطنية الفاخرة الراقية اللي تتسابق فيها كل مؤسسات وهيئات الدولة بتقديم افضل ما عندها والناس كلها مستمتعه وفرحانه.
عذراً يا وطن عمري!
بكل ما تحمله كلمة اسفين من معاني نقولها لك يا وطن الأوطان على اللي سووه البعض اللي ربي قردنا بوجودهم وانحسبوا علينا كويتيين ونالوا شرف حمل السوده المزكرته بالذهبي اللي يحلم بشيلتها وايد غيرهم، بس على قولة المثل المصري «يدي الحلق للي مالوش ودان»، بس احنا متأكدين يا وطن النهار انك اتعرف منهم الكويتيين وشنهي فعايلهم ومرايلهم لي حجت حجايجها، ومتأكدين انك اتعرف ان هؤلاء كلش مالهم شغل بالوطنية اللي انت تتمناها من شعبك اللي ودك تفتخر فيه، فعذرا يا وطن عمري على الأذيه اللي تسبب فيها بعض الخارجين عن التحضر واللي بحول الله وقوته راح نقضي عليهم ونوعدك ماراح اتشوفهم بعيد ميلادك المجيد الياي.

تعليقات

اكتب تعليقك