الأمنيات الكويتية لم تتغير منذ 2009.. هذا ما يراه ذعار الرشيدي
زاوية الكتابكتب يناير 1, 2013, 11:50 م 621 مشاهدات 0
الأنباء
الحرف 29 / الأمنيات الكويتية المستحيلة
ذعار الرشيدي
في العام 2008 جردت وبشكل سريع أمنيات الكويتيين للعام 2009، وها نحن ندخل العام 2013 ولم يتغير شيء فالأمنيات الكويتية ذاتها لم تتغير، وأعيدها من باب تكرار ما نعرفه كلنا دون تغيير.
1 - أكسب أي سحب من سحوبات البنوك المليونية، أو سحب سيارة في جريدة أو جمعية أو كوبون سوق شعبي، المهم ان أفوز وأكسر نحس السنين «كل الكويتيين يشوفون أنهم منحوسين ما تدري ليش».
2 - يطيحون القروض «عشان يقترض مرة ثانية وثالثة ورابعة وخامسة».
3 - يفوز ولد عمي في انتخابات 2013، سواء أمة أو جمعية تعاونية أو ناد أو «إن شاء الله» في نادي أصدقاء مجلة ماجد، المهم يفوز واحد أعرفه عشان أمشي شغلي.
4 - أتعرف على مليونير أو واحد من ربعي يصير مليونيرا «مو أهوه يصير مليونير، لا واحد ثاني يصير مليونير وأهو يتعرف عليه... عاش الكسل المزمن».
5 - يلغون البصمة والكرت من دوامي، عشان أعيش ملك زماني، أو أنقل لدوام من هالدوامات اللي يداومون يوم بـ35 يوما.
6 - أشتري خطا ماسيا بـ5 أو 6 أرقام متشابهة.
7 - أسفر سائقنا، لأنه صار لي 5 شهور مو معطيه راتبه وكله يحن.
8 - أسس شركة أو مؤسسة وأضمنها، أو أحضر عليها 5 كفالات أو 10 كفالات حسب الواسطة وأرد أضمنها «المهم آخر شيء ما يسكرون ملفها بالشؤون وما أحال للنيابة العامة».
9 - أقطع السجائر.
10 - أرد أدخن مرة ثانية بس على الخفيف.
11 - ألاقي كنزا «نص الكويتيين حسبالهم علاء الدين صج».
12 - البنك يغلط في حسابي ويحولون لي مليون دينار، وما أحد يدري «ما قلت لكم نص الكويتيين حسبالهم علاء الدين صج».
13 - أسوي ريجيم وأضعف «طبعا نص نسوان البلد صار ممكن يدشون مسابقات ملاكمة الوزن فوق الثقيل، لا ويفوزون بالضربة الفنية القاضية بعد».
14 - أدش نادي عشان أشيل الكرش «يدش يومين ويطلع ويرد حق الديوانية وقالوا وقلنا».
15 - أقدم برنامجا أو أطلع بشاعر المليون، المهم أصير مشهور، أو أنا والربع في الديوانية «نتحاطط» ونسوي قناة فضائية.
16- أروح لطبيب الأسنان وأسوي كورس كامل لتعديل أسناني «ثلاثة أرباع الكويتيين يكرهون أطباء الأسنان كره العمى».
17 - أروح يوم مراجعة في أي دائرة حكومية وما يقولون لي تعال باجر أو سكر الصندوق أو الكمبيوتر عطلان.
18سائقو التاكسيات الجوالة البنغالية يختفون من البلد نهائيا.
19 - أن استمر 24 ساعة دون أن أطلب مطعم توصيل «80% من سكان البلد صاروا مدمنين مطاعم».
20 - إرهابيون يخطفون طيارة وأنا اللي أنقذ الركاب وتطلع صورتي في الجرايد ويسوون معاي لقاءات.
21 - يدقون علي ويسلموني حقيبة وزارية إن شاء الله لو لـ 24 ساعة وبعدها تستقيل الحكومة المهم أصير وزير وأدخل نادي «الوزراء السابقين» وراتب يمشي 5000 دينار طول العمر.
22 - أرد البيت وألاقي أم العيال طابخة مو الخدامة.
23 - أسافر القطب الجنوبي «كل الكويتيين عندهم عقدة زيارة أماكن ما أحد راح لها بس عشان يردون يسولفون».
تعليقات