يوسف الحجي يرى انه ماكو فايدة بالتعامل الناعم مع التكتل الوطني وان البنك المركزي صم بكم اعمى

■ ودي أقول حق الشعبي والتنمية والإصلاح لا تطقون ناعم مع الوطني ولا تحطونهم في حبتكم بالنسبة للاستجواب المليوني اللي راح يقدم يوم الخميس القادم ، الجماعة للحين مو عارفين راسهم من كرياسهم وكل يوم تصريح مرة يقولون لا تتحجون باسمنا ومرة يقولون لما نجتمع راح نحدد موقفنا، وأنا اقول الجماعة ما يفكرون يزعلون الحكومة علشانكم بعد ما قدمت لهم الحكومة كل شي وسهلت لهم كل شيء.

ولو شوي تلفون ورا راح تعرفون شنو موقفهم بس ودي أنصح جماعة الشعبي والتنمية والإصلاح لا يطقون ناعم معاهم وخلهم يرددون غيرهم في الاستجواب المليوني.


المركزي لا يسمع لا يرى لا يتكلم

■ الملايين تتحاذف يسار ويمين فوق وتحت والشعب طاقته بوهه مو عارف منو اللي عطا ومنو اللي أخذ والجرايد شغالة كل يوم فيلم مرة أبطاله نواب وأخرى رجال أعمال وآخرتها وزراء سابقين.

يا جماعة ترى يبون يضيعون الطاسة مرة يقولون راشي ومرتشي ومرة غسيل أموال ومرة كبت أمي وأخرى بقمة أمه وبعض البنوك تحول للنيابة.

لكن المصيبة واللي يحير أن البنك المركزي صم بكم لا يسمع ولا يرى ولا يتكلم يعني أطرم، والمشكلة أن البنك المركزي هو الجهة المسؤولة واللي تقوم بدور رقابي على البنوك والفلوس اللي تدش وتطلع منها.

ما أدري ليش المركزي ساكت وما يبي يقول ممكن اللي قاعد يتلاقف الملايين أكبر وأقوى من المركزي، وأن أحد قايله دير بالك تتحجه أو تقول شي بس ما أقول إلا أبوي ما يقدر إلا على أمي.

سؤال وجواب

■ شنو أسهل وأسرع طريقة بأنك تصير مليونير؟

تصير نائب حكومي

■ شنو الخطين اللي عمرهم ما يلتقون مع بعض؟

التنمية والشعبي مع الوطني

■ ليش الإعلام الحر محارب؟

كلمة الحق تعَوِر

■ منو اللي الحكومة ما تقدر حتى تقول اسمه؟

تاجر اللحوم الفاسدة

■ شنو الشيء اللي له بداية وما له نهاية؟

المشاريع الحكومية

■ شنو الشيء اللي الحكومة راح تقره؟

العلم عند الله