البطاقة المدنية بهدلت مارد بوحباج والداخلية هددته بلجنة ثامر للجنسية .. حوار مع المارد يجريه نبيل الخضر

عذبوه في   الـحكومة مول ..  وساوموه في   سجن طلحة 
البطاقة المدنية بهدلت مارد بوحباج والداخلية هددته بلجنة ثامر للجنسية     
Saturday, 24 July 2010 
 بقلم  :  نبيل الـخضر

اشترى أبوحباج  » خاتم «  من ساحر افريقي   بـ   20   ألف دينار لتخليص معاملاته،   ولما عاد إلى البلاد فرك الخاتم فخرج له المارد . 
المواطن :  أبيك تخلص هذه المعاملة في   وزارة الشؤون . 
المارد سلم المعاملة إلى الموظفة التي   نظرت اليها باحتقار وقالت :  لازم   يسويلك صاحب المعاملة توكيل بوزارة العدل . 
المارد ذهب إلى الحكومة مول في   برج التحرير وطلب ورقة توكيل عن صاحب الخاتم . 
المسؤول :  وين بطاقتك المدنية؟  
المارد :  ما عندي ..  آنا مارد . 
المسؤول :  مارد .. عفريت حتى ابليس بنفسه من   غير بطاقة ...  سلامتك . 
المارد :  شسوي؟
المسؤول :  راجع هيئة المعلومات المدنية . 
المارد طار إلى الهيئة بسرعة البرق وسأل الحارس المصري :  شسوي؟
الحارس :  بص لازم تقف بالدور،   وهناك أرقام كده وكده ..  بس متنسانيش بالحلاوة   يا باشا . 
المارد تسلم الرقم،   ولما جاء دوره طلب بطاقة مدنية من الموظفة . 
الموظفة :  مكان سكنك؟  
المارد :  في   الخاتم . 
الموظفة :  الله ..  انت سيد الخواتم خوش فيلم ..  شنو جنسيتك؟  
المارد :  شنو جنسية؟
الموظفة :  آه بدون ..  راجع لجنة المقيمين بصورة   غير قانونية . 
المارد طار إلى وزارة الداخلية . 
المسؤول :  قول الصج شنو جنسيك وإلا ماراح تشتغل او تتعالج او تدرس .  أو تتزوج .. وخل معصومة تفيدك . 
المارد :  انا من افريقيا . 
المسؤول :  أوه .. خوش اعتراف ..  هذا الشغل العدل ..  مو اللي   صار لهم سنين   يكذبون علينا ..  من وين من افريقيا؟  
المارد :  من قبيلة الأحمر . 
المسؤول :  الأحمر .. من أي   فخذ بالقبيلة؟
المارد :  احنا عفاريت ما عندنا فخوذ . 
المسؤول :  عفريت ..  لو الشيطان بكبره   يجينا ما راح نمشي   معاملته .. ليش العفاريت ما سمعت بلجنة ثامر؟
المارد :  لازم اخلص التوكيل شسوي   علشان أحصل على جنسية؟
المسؤول :  هات احصائية   65   من وزارة التخطيط . 
المارد :  عمري   700   سنة . 
سهلة سالفة الـ   65   مالتكم .
طار إلى وزارة التخطيط وطلب احصائىة   65   وبعد البحث جاء الجواب :  لا   يوجد ما   يؤكد وجودكم في   الكويت .
المارد حكى للمسؤول قصته وطلب منه الحل فقال :  اشتر جواز دومنيكاني   أو أفغاني ..  أو نيجيري ..  على كيفك،   المهم تجيب اثبات علشان تخلص معاملتك،   وبالفعل تمكن المارد من الحصول على جواز بنغالي   بعد ان دفع المقسوم وعاد إلى البلاد .
   المسؤول بالبطاقة المدنية :  على منو اقامتك؟  
المارد :  على بوحباج .
المسؤول :  راجع الداخلية .
المارد طار إلى الوزارة وسلّم الجواز البنغالي .
الضابط :  لا والله شلون داش الديرة،   وين الختم؟ خذوه وحطوه في   سجن طلحة .
داخل السجن أخذ المارد   يفكر في   وضعه المأساوي   ويلعن أبو اليوم الذي   دخل فيه الكويت وخطط للانتقام من أبو حباج الذي   ورطه ..  وعندها دخل الضابط ليقول له :  تكفى   يا معود لا تنحاش ترا اذا لقوا واحد ناقص   يسوولي   سالفة ..
المارد :  وإذا اعطيتكم معلومات خطيرة ..  تخف علي   التهمة؟
الضابط :  طبعاً   طبعاً .
المارد :  خذ ..  بو حباج تاجر مخدرات والشيخ أحمد الخليفة ما   يدري   عنه لأنه مسنود ..  بوحباج   يلعب بتوكيلات   غرفة التجارة ومن كثرهم طلب   يسويلي   توكيل ..  بوحباج نصب على العشرات بحجة العلاج في   الخارج وأخذ المقسوم بدعم من قيادي ..  بوحباج   يأخذ على كل راس بدون   20   ألف دينار ووعدهم بالجنسية ..  بوحباج   يزور شهادات الدكتوراه وربع دكاترة الكويت مزورين شهاداتهم ..  بوحباج ....
الضابط  ( مقاطعاً ):  يكفي   خلاص كم مرة نبي   نعدمه .
انتقلت قوة المباحث لتقتحم منزل بو حباج لتضبطه وتواجهه بالتهم ..  المواطن خاف بعد ان سمع صفارات سيارات الشرطة وفرك الخاتم ..  فطلع له الساحر بنفسه ليقول :  يا ترد
   المارد اللي   بهدلته أو تجي   معانا نغش في   كونتينرات أكل رمضان اللي   وصل الشويخ .
المواطن :  والتوكيل؟
الساحر :  راح نسويلك اياه علشان تطلع البضاعة من الميناء .