الحكومة مخليه القرعا ترعى، والأسعار مثل النار-فحوى مقالة محمد الشمري

زاوية الكتاب

شو عليه ياحكومة الأسعار صارت مثل النار!

ضغوط لتعميم زيادة الخمسين دينارا, لا لا لا ماهي من قلبي بس لما اتذكر الغلاء اقول واللي يرحم والديكم فكونا من هالسالفة .. مانبي زيادة الخمسين اللي من وراها تطلع ألسنتنا خمس بوصات من القهر على سحب هالخمسين ثلاث ادبالها من جيوبنا المغلوبة على امرها .. التجار عندنا هداهم الله اول مايشمون خبر او اشاعة زيادة رواتب على طول ساعتهم تعلن الاشارة فيها على الساعة الثانية عشرة من منتصف الليل معلنة ظهور الرجل الذئب مثل مانسمع في حكايات كان يامكان اللي تظهر الرجل وهو يتحول الى ذئب تطلع له انياب ومخالب على عكس طبيعته البشرية ويسن ويحد سكاكينه ايذانا ببداية المجزرة والذبح الحلال براتب هالموظفين اللي على الارض .. اول شي هو دبل السعر ضعفين واكثر بكل المواد الاستهلاكية المتعلقة بالمواطن .. وبما اننا على وجه العيد اعاده الله علينا بخير نخلي الكلام عن ملابسه وهدومه اللي ترتفع بسعر غير معقول غصبا على شواربنا ورغبتها اللي مالها اي اعتبار او قيمة مستهلكين سمعا وطاعة ما باليد حيلة .. العيد جاي والعيال يبون ملابس والجزار بيده سكين نشتري ابو خمسة بعشرة وهلما جرا .. شو عليه الاسم كويتي وعنده كل شي وكرمال عيون هالتاجر نشتري مامن فرحه ببلاش ..
هالمسكين وراه ايجار والتزام وبطالة سنة كاملة وعيال في بلده فاتحة حلوقهم يبون ياكلون وبيته باقي له بس صبة الدور العاشر, والتجارة شطارة ياحبيب (ألبي)
وخلي القرعة ترعا مدام مافيه لا حسيب ولا الاستاذ رقيب من الاخت حماية المستهلك وامها الحاجة وزارة حفظهم الله ورعاهم ذخرا للبني ادمين المستهلكين انا وانت ورقصني ياجدع من الغلب اللي حنا فيه وقلة الحيلة اللي ركبتنا في ظل طناش حكومي ونيابي كل همه نزيد خمسين واللا مانزيد لين خلونا مثل لامواخذه مثل اللي هجم عليها الذيب وراعيها هو والهوهو بتاعه نايمين يحلمون خير اللهم اجعله خير بمرج اخضر في اخضر .. حبايبي نجوم الساحة المحلية ترا المطلوب ضبط الاسعار وتخفيضها الى السعر المعقول .. واللا انتم ناسيين ان اغلب ناخبينكم على الله وثم على الاخ معاشي وهذي لحيتي ان عاش فكونا من المطالبات اللي ما وراها سنع وكل اللي تسويه نزيد قهرنا .. ترا ماهي من مطالبنا خمسين دينارا وزيادة معاشي على عماها اللي نبيه سعر معقول وراحت بال وما ضاع حق وراه مطالب .. وشو عليه ياحكومة الاسعار صارت مثل النار ونار نار مخباي قايد نار .. وتأبرني ابن عمي.

السياسه