د. خلف الخطيمي الخالدي: ياهلا بضيوفنا

تبتهج الكويت اليوم بقدوم قادة دول مجلس التعاون الخليجي لحضور القمة الخليجية ال 45 ، وللشعر كلمة في هذه المناسبة العزيزة، من خلال قصيدة رائعة للشاعر القدير د. خلف حمود الخطيمي الخالدي ، تطرق فيها إلى كل دولة خليجية ذاكراً أمجادها التاريخية  وانجازاتها الحضارية ، ليعرّج على وطنه الكويت ساكباً مشاعره الصافية ومحبته الصادقة لأميرها الرمز وشعبها الوفيّ:


سَم بسم السلام وزان مبداها
والمشاعر تسولف عن مباديها

طار للجو قاف الشعر واشجاها
حي  طيرٍ تغنى  في معانيها

لي على الحرف شرهه و يتحراها
نبض قلب الخليج اللي يناديها

اجتمعنا على التقوى ومعناها
ما يداني خفوقٍ ما يدانيها

وارتفعنا نجوم ٍفي محياها
نور والدرب واضح في مساريها

يوم حنا نجيها ما حدٍ جاها
الصقر له خزيزه ما يخليها

من يغوص البحور وحس نجواها
في هديرٍ يقول الموت تاليها

من يشوف الصحاري خاف ممشاها
في سمومٍ يشقق جلد ماشيها

راس مال الخليج ارجال مسعاها
ما تهاب المنايا في مساعيها

والعفو شيمةٍ حنا ورثناها
والقلوب العظيمة  مجدنا  فيها

يا هلا والهلا عرضة لعبناها
لعبة الحرب في نجد وروابيها

ديرةٍ للحرم حامي ذرا حماها
(اخو نورة)  حماها عاش حاميها

الف مليون مسلم ما تعداها
نشوة الدين والإيمان داعيها

مرحبا والمداين سبع انشاها
(للفلاحي ) شهودٍ  في مبانيها

عمر الأرض والإنسان مبناها
يا عسى الغيم يارحمن يسقيها

والامارات صوت العز مغناها
جر لحن المهابة  في اغانيها

بالهلا والغلا حنا دعيناها
من غلاها هلانا ما يكفيها

ديرة (للخليفة) وان حضناها
بحرها كم حضنها في شواطيها

دار (دلمون) تواريخٍ قريناها
في بطون المراجع بان ماضيها

ودوحة للخليج القلب حياها
قال كل الخليج الله يحيها

فج وجهه الخطر بالبوم وارساها
(ابن ثاني ) على العليا اموديها

في صدى المال واليامال طرياها
والشهامة طبيعة في اهاليها

مسهلا والرسايل بان فحواها
ديرة عمان والسلطان غاليها

عزّها بالعلوم وجدد ادماها
ونجمها في سماها حب اراضيها

والحصون المنيعة لا ندبناها
سولف الصمت فيها عن خوافيها

دارنا وش نقول إليا ذكرناها
وين أبدى بحضرها او بواديها

كويتنا عزنا والشيخ يمناها
اخو مريم قمرها في لياليها

صانها الشيخ والربان ارساها
بفضل ربي على العزة مراسيها

له عينٍ تنام وعين خلاها
ساهرة في امورٍ بان صافيها

هو رمز البلاد وهو رجواها
في حياته كويت العز يفديها

ديرتي والمعاني في مزاياها
يتعب الحرف ما يقدر يجاريها

يوم ذات السلاسل ثار مرماها
في بلادي صدى  التاريخ يرويها

والمعاني لها حيٍ تمناها
صانها في عزير الروح  وافيها