الصوت والصدى شعراً بين #علي_القحطاني و #عبدالعزيز_الفدغوش

المساجلات فن شعري في مجال الأدب الشعبي إذ يكتب الشاعر قصيدة تحمل موضوعا  شخصيا أو اجتماعيا أو سياسيا ويرسلها إلى شاعر آخر منتظراً منه الرد على قصيدته بذات البحر والقافية والموضوع ،

وفي هذه المساحة ننشر قصيدتين رائعتين "صوت وصدى" بين شاعرين قديرين هما علي بن محمد القحطاني وعبدالعزيز سليمان الفدغوش يتناولان بها قضية القيم الاجتماعية من الكرم وعدم الجحود والنخوة والاعتراف بالجميل.

صوت:
من علي القحطاني
"وعود الجحود"

صــديقي اللي غــرّنـي بالوعـــودي
يوم ابتدينـا الجِد ضـاعـت علومه

‎أمسـىٰ يقـول أعْتــز وأرقىٰ سنـودي
‎أسمي يجي في البنك بعد الحكومه

‎يبي يجـــرّب ويـن توصـل جهـودي
‎ولا أرتخىٰ المحــزم وخارت عـزومه

‎الجود يا الفدغـوش عنـد الهنــودي
‎وأنـا افتكــرت إنّـا احْــماتـه وقومـه

‎فاصـل حدود الأصدقاء عن حدودي
‎ما أحـد ٍشريك الآدمي فـي همـومـه

‎وعـزّلت عن رفقة عـريب الجـدودي
‎وشــهرٍ بــدال المــدح لله أصـومـه

‎ولـولا محـمد بـن عبــود العمـودي
‎كاسـي عُرىٰ اللي ناشـزات عظومه

‎ســماه تهمــل مـاه قبـل الرعـودي
‎وراتـــب وزارة مـا يكــفيـه يـــومـه

‎فتّـــح زنـــازينـي وكسّــر قيـــودي
‎جـــزاه عنـد اللـي تســبّـح غيومـه

‎صحـيّـت يا عبــدالعزيـز الرقــودي
‎وغنيت يــوم الفــن ولّـت نجـومـه

‎وأخذت مســباحي وغلفـت عـودي
‎وماشــيت من طّول وقصّر اهدومه

* * *

صدى:
من عبدالعزيز الفدغوش
"شهود الجود"

‎من درّ منظـوم المثـل والعقـودي
‎جتـني بيــوت ٍ وافيـةومْحكومه

‎نوادر  ٍمن فيـض فكــر امحمـودي
‎طرق ٍ لابن قحطـان جدّد رسومه

‎جدّد وجَدّ وجَـاد رغـم الحسـودي
‎حـتىٰ صنــع لـه نهــج كـل ٍ يرومـه

‎حــرّك بقــوّ المفــردة للركـــودي
‎وعلى نجــوم الشِّعر غطّت نجومه

‎نبــراس شِّــعر  ٍ والتميـز شهودي
‎ومما كتب باحساس وضّح همومه

‎غــرّه صــديق ٍ باللــوازم جـحـودي
‎الليّ بوقـــت الجِـدّ ضيّـــع يمومـه

‎ما به على الشِّـدات عزم وصمـودي
‎لـو له رصــيد ٍ مـا تعــدّد رقومه

‎لـو كـان مـاله عــد ّرمــل النفـودي
‎بــرج المعــالي والثنـاء مـا يسومـه

‎صَحايف المخـلوق بيض ٍ وســـودي
‎وبين الردا والطيب حـرب وخصومه

‎يفـنىٰ التطبــع والطبيعــة تعـــودي
‎وكلّ ٍ يا أبو ميســون يتبـع سلومه

‎كـلّ ٍ علـى مـا قيــــل ودّه يـــزودي
‎مـير العــلا يحتـــاج وقفـة وقـومـه

‎بحر الفخر والطيب صعـب ٍ يكـودي
‎إلا علـى نبــــراس عـــــزّ  ٍ يعــومـه

‎مثل العمـودي في تواضــع يجـودي
‎الليّ بسماء الأمجـاد بانـت وسـومـه

‎علىٰ صنيــع ايــديه ترفـــع ابنــودي
‎شـكر ووفـا وعـرفان حــزة لـزومـه

‎أبديــت لك وأهـديـك باقــة ورودي
‎وأبيات شعرٍ  بالسـلام مْختومه