ضوء وانعكاس في الشعر بين عبدالله السلوم ومحمد السديري

كتب رجا القحطاني

هي مساجلة شعرية "ضوء وانعكاس" بين شاعرين من عمالقة الشعر الشعبي في الجزيرة العربية هما عبدالله السلوم التميمي الذى كان رحيله عام 2002 . والأمير محمد الأحمد السديري الذي رحل عام1979 ،

محمد السديري غني عن التعريف بما تتصف به قصائده من جزالة المعنى وجمالية المبنى فضلا عن أنه صاحب رواية "الدمعة الحمراء" ، وكتاب "أبطال من الصحراء، وديوانه الشعري الذي جمعه وأشرف عليه الشاعر طلال السعيد.

وعبدالله السلوم يُعدّ من أفضل الشعراء في جيله بما تتسم به نتاجاته الشعرية من قوة في التعبير وأناقة في التصوير، وأسماه السديري ذاته بحتري الشعر النبطي، وله ديوانان "الخطوة الحائرة" وديوان يحمل اسمه.

لنتابع الضوء والانعكاس بين الشاعرين الكبيرين ، لنكتشف مقدرة كل منهما على الإبداع الشعري.

-ضوء-
من عبدالله السلوم:

باقي من الذكـرى رسـومٍ للاطـلال
هوج الريـاح العاتيـة مـا محتهـا

اظنهـا تبقـى علـى مـر الاجيـال
تفيـد عـن قـدرة يديـنٍ بنتـهـا

ارض نشا فيها مـن الخلـق نـزال
وشخصٍ عشقته عاش في ناحيتهـا

ان غبت عنها شفت من ضيقة البال
ما يلحـق النفـس العليـة عنتهـا

وان جيتها عقب التباطي والامهـال
فرجلي تسير اليـن تاصـل جهتهـا

واقف عليها وارسل الطرف يجتـال
والرجـل ماكـن البسيطـة تحتهـا

تموج كنـي واقـف فـوق زلـزال
وعينـي تضيـق بعبـرةٍ حابستهـا

اخاف يـدري بـي حسـودٍ وعـذال
حيث العيون دموعهـا هـي لغتهـا

يا شيخ واقلبي عليه الصبـر طـال
وراحـت مسراتـه سريـعٍ فوَتها

يا شيخ كلن قدر مـا يحتمـل شـال
وانا حمولـي كيـف نفسـي قوتهـا

نفسي لها عن لـذة العيـش سـلال
تتـوق لاخبـار القديـم وسنتـهـا

ولا الغـرام بعشقتـي طقـه الجـال
واصبح جنـازه والسنيـن اقبرتهـا

ولاعاد لي ملحوظ في الواو والـدال
فلت يدي صفحة والاخـرى طوتهـا

واصبحت من عقب المخاطر والاهوال
اجنـب  الحيـة  واعـاف  شْجرتها

يا مير بينـت السبـب لـك ولا زال
في النفس حاجة وانكفت ما قضتهـا

يا مير شخصٍ ياصل الحبـل بحبـال
وشخصٍ يسره يـوم يقطـع بتتهـا

وانت العديم مْعرّب الجـد والخـال
ونفسك مراقيـب الشهامـة علتهـا

خذها شهادة واحـدٍ مـا بعـد قـال
كلمـة نفـاقٍ  يرتـجـي  منفعتـهـا

والناس يا بو زيد من كـل الاشكـال
من شاف عثرة عاثـرٍ مـا غمتهـا

الا الـذي ماللـردا فيـه مـدخـال
هذاك ابـو نفـسٍ يحصّل بختهـا

وقتٍ مضى له حال واليوم لـه حـال
وارجي من المولى حسـن خاتمتهـا
____________

-انعكاس-
من محمد السديري:

لاباس يا لابس من الـود سربـال
ياللـي بيوتـك حكمتـك فاتلتهـا

مثل الذهب مااضعفت بيتٍ ولا مال
من الجواهر فيض عقلـك نحتهـا

ابيات عن شعر ٍلغيرك بها انفـال
ابدعـت بأولهـا وفـي تاليتهـا

ماجور يا شاكي هوا زين الاقبـال
الجادل اللي لـك تعـوج ارقبتهـا

الياس لا يبعدْك يـا ذرب الافعـال
اتعب قدم رجلك على مااشتهتهـا

الرجل سقها بالرجا واطلب الفـال
وسعدك بتالي خطوةٍ قـد خطتهـا

وانا معك بالحال والـراي والمـال
وارجي عسى المولى يحل شْركتها

اقطف زهر مالاق والعمر باسمـال
والحق هـوى  روحٍ  لروحٍ بغتها

عب الهوا عبه على كل الاحـوال
واخلص لمن بالود عينك رجتهـا

اشرب يابن سلوم من در الاهجال
والنفـس وصلهـا لـدارٍ دعتهـا

النفس روضهـا والايـام باقبـال
توذيك كان ان الهمـوم سهجتهـا

وعن الكرا عيني بها ذعر وجفال
وشواطنٍ مـن سهْرَها داعبتهـا

شواطنٍ مابيـن نـازل ورحـال
البارحه يـوم الطـواري حَدَتها

يوم انها شافت غريبـات الامثـال
ابيات مـن نظـمٍ غريبٍ قرتها

تاهت لنجم الجدي بالليـل تختـال
وسبـع النعايـم كنهـا حاضنتهـا

العين هاجت واصبح القلب يجتـال
وذكرت دارٍ قبـل رجلـي وطتهـا

انشد وتلقاني من الحـب مكتـال
وعيني غزيرات الدمـوع ذرفتهـا

يجذبني الهاجوس في راس ماطال
وكل هضبة رجل العنـا مشرفتهـا

وقلبي بحرف الواو والدال مـازال
يهيم بريـاض الغـرام وسعتهـا

لو كنت بايام شديـد بهـا الـلال
النفس لذات الهـوا مـا نستهـا

عسى يسقيها من الغيـث همـال
من مزنة ٍتمطر والأخـرى قفتهـا

شوف الزهور وريحها ينعش الحال
وكم غرسةٍ بيدي قطفـت ثْمرتها

للريم فيها يا بـن سلـوم مدهـال
وغـر المـزون بوبلهـا  عللتهـا

شاحت لها عيني وقلبي لها مـال
تذكـرت   خلانـهـا   واعرفتـهـا

شاحت تراعي للروابـي والاقـذال
بايام طـرد الصيـد يامـا رقتهـا

بالقلب ذكراها صبغ صبغة الخـال
في خد عـذرا خلقـة الله زهتهـا