‫⁧‫#محاورة‬⁩‬ ‫بدع المعاني بين الراحلين عبدالله المسعودي ومستور العصيمي‬

الشاعران الكبيران عبدالله المسعودي ومستور العصيمي رحمها الله من أشهر شعراء المحاورة"القلطة" في الجزيرة العربية،
فالمسعودي على الأرجح رحل في أواخر السبعينات الميلادية ، بينما رحل العصيمي في يناير 2021م.

لكل منهما طابعه الخاص في بدع المعاني في طوايا الأبيات  ، وفي هذه المحاورة الرائعة نجد أسلوب الرمزية والفتل والنقض  المستحب في هذا النوع من الشعر ، قد تكون العبارات واضحة لكن وراءها مقاصد قد تكون سياسية أو اجتماعية مفهومة لدى الشاعرين"الخصمين"
وإن تصور القارئ أنها شخصية ، يبقى المعنى في ذهن الشاعر ، وللمتابع أن يضع تحليله وتأويله لكل بيت،

كما نجد في هذه المحاورة عبارات من الحكمة والتلاعب الجميل بالكلمات:

المسعودي:
واحدٍ ودوه جابوه مدري كيف قال
منهو اللي دفّ مستور ونْدفّه وراه

اخوياه يْدورونه وهو رايح لحال
ماخبرت اللي يبي يروح ويكب اخوياه

العصيمي:
ماخبرنا اللي يضيّق سريع الانفعال
من يقول العلم جاني منين العلم جاه؟

وأشكل الاقوال ياذيب ماهي راس مال
من ظمي لو يشرب البحر مايقطع ظماه

المسعودي:
الخبر والعلم تحت العمامه والعقال
والعقال مْع العمامه على راسك هذاه

من زعل قلّة سعه يشتري له وسع بال
قبل يقعد له زمانه على راس الحصاه

العصيمي:
ماعلى راسي سوى ماعلى روس الرجال
والعميل الوافي الناس ماتنقص وفاه

والزعل طيّب، ومكروه في بعض الحوال
والأمانه ماتضيّع  على طول الحياه

المسعودي:
وانت فيك اطبيّعه من جدودك والخوال
لاغريبه تعجب الناس من قِدر وغطاه

ان عطتْك كْتوفها ماتربّطْك الحبال
وان توجه لك نحَرْها تلحفت العباه

العصيمي:
وان بدت لك عوجه، العوج برقاب الجِمال
مير من عارض بماعونه السيل امتلاه

من تملّت به غروبه تضاوتْ به مَحال
وكل مااوحى له منادي ينادي قال هاه

المسعودي:
مامعي ماعون والوادي الممطور سال
وانت كيف يْسيل واديك وخْيالك صحاه

والحبوب الصم لو قيمة الحبه ريال
مابلعها غير من تطحن الحبه رحاه

العصيمي:
لو زهمت ابكم يجاوب على هذا السؤال
كيف عاقل يلتبس ثوب مافِصّل علاه

لِن وصلْك العلم عندك محايل واحتيال
حيلة الحصني ليا شاف سبع الليل جاه
_________
*هذاه : هذا
*اطبيّعه: تصغير طبيعة
*غروبه- محال : من أدوات سحب الماء من البئر
*وخْيالك: سحابك
*صحاه: صحو
*علاه: عليه