رجا القحطاني: جمّ التواضع

قصيدة في رثاء الشاعر والأديب الراحل عبدالعزيز  سعود البابطين .. رحمه الله:

لافجعة الخاطر ولا دمعة العين
تستوعب أعماق  القلوب الحزينه

بعض الاقارب حين راحوا عزيزين
وبعض الأباعد حين راحوا  غبينه

احد  يروح  ويفقدونه  ملايين
واحدٍ يجي ويروح من دون بِينه

عبدالعزيز البابطين ارتحل وين
أنا  اشهد  إنّا  كلنا  فاقدينه

على الرضا لو غاب عنا وعلى الزين
تخلّده  فينا  السجايا  الرزينه

يارب  ياقابل  صلاة  المصلين
يلبس من الرحمه لباس السكينه

جمّ التواضع والوفا حافظ الدِّين
ماغرّته  دنياه  طيلة  سنينه

على بياض الوجه عاش الثمانين
وبذْل المكارم بين نفسه وبينه

لاقال ابي مهله ولا قال بعدين
لاجوه شاكين العوَز قاصدينه

ابو سعود ارثيه حينٍ بعَد حين
وارثي الشعر بفراق حارس عرينه

هو للثقافه مثل نبض الشرايين
في راس الانسان وفؤاده وعينه

شاعر ومن حبه لشعر الأساطين
أظهر لنا المعجم جواهر ثمينه

شيّد صروح المعرفه والمضامين
وفي بذله  الأموال  تندا  يمينه

المكتبة  منها  أهمّ  العناوين
صرح الشعر  يدهش  نظر زايرينه

أحيا لغتنا  الأم بين  البلادين
وتعلموا واجد لغتنا الرصينه

عبدالعزيز ادرك طموحه بتمكين
ولا يدوّر   منفعه  في   يدينه

ابن الكويت أعطى بشتى الميادين
برفع اسمها ساهم ورافع جبينه

يارب  ياقابل  صلاة  المصلين
يلبس من الرحمه لباس السكينه

وتجعل مقره داخل الجنه آمين
وتضفي عليه ثْياب سندس حسينه