رجا القحطاني: ألف قمة ما تحرك شئ فينا!

ألف قمة ماتحرك شي فينا
دام ركب الياس نوّخ واحتوانا

كل الاحباطات تتْراكم علينا
ننكر الحاضر ونتْلفّت ورانا

مذبحة  غزة  مذلّه تعترينا
مافزعنا لْشعبها يوم انتخانا

ياكرامتنا اختفيتي واختفينا
أخفِتِك عنّا هشاشة مستوانا

مالنا من همنا مرسى  ومينا
نحتضن مأساتنا في حضن اسانا

من يلوم اللي يقول انّا انتهينا
زادت الهوّه  ولا نلنا  هوانا

صابنا طبع النعامه ماهقينا
راسنا نخفيه في زحمة شقانا

التصافي  مانجيه  ولا يجينا
والتجافي ، يبتليه الله، بلانا

أكثر الأخطا توارد من حدينا
نحذف الأخطا على عاتق سوانا

للأسف مامن وسيله في يدينا
زين صرنا نحمل يْدينا معانا!

للأمم صحوه وحنا ماصحينا
غير شي جاي أهل الكهف جانا

يضحك العالم علينا .. مادرينا
وان درينا نبلع الحسره ترانا

أي قمه  ترجع الآمال  الينا؟
أي وحده  يرتفع فيها  لوانا؟

كم وكم ياما وياما قد سعينا
مانفعنا كل مسعى من ردانا

بالوعود الصفر بعنا واشترينا
لين علّقنا الخساره في لِحانا

نلتوي بالأمس  لكن ماخذينا
أمسنا قدوه .. وحاضرنا نفانا

عن "نطاق التغطية" حنّا غدينا
تطلع  "العنقا" وحنّا  بمْغَدانا

ياوليّ   الكون   هوّنها   علينا
طالت النكبة  وجانا  ماكفانا

من  سواك  يْعيننا  يوم  ابتلينا
ومن هو الأحوج الى عونك سوانا