‫ناجي الزيد: شنو يعني كم مليون انباقت هني وكم مئة مليون انباقت هناك وشنو يعني المشاريع ما تخلص والشوارع عفسة والخدمات "شوفة عينك" ما في أمل تتحسن!‬

لا تتعب حالك...

ولا تعصر مخك...

المسألة ما تسوى ولا تستاهل...

شنو يعني كم مليون انباقت هني... وكم مئة مليون انباقت هناك... وشنو يعني المشاريع ما تخلص، والشوارع عفسة، والخدمات "شوفة عينك" ما في أمل تتحسن!

ولا يهمك كل شي يتعوض...

المهم لا تكدرون المسؤولين ولا تزعلونهم، كل شي ولا المسؤولين يزعلون ولا يتكدرون...

المستشارين ما تهمهم الديرة ولا يهمهم أهلها.

كل اللي يهمهم مصالحهم، وأن المسؤولين ما يزعلون ولا يتكدرون...

إي نعم... هذا ملخص الموضوع، فديروا بالكم كل اللي نبيه أن يكون المسؤولين مبتسمين ويضحكون، وكل خبر تساسرونهم فيه أو تشورون عليهم فيه يفكرون أن مستشاريهم قمة العبقرية وماكو مثلهم!

ولا شلون يا جماعة، ما سمعنا ولا مستشار فنشوه، ولا استغنوا عن خدماته، لأن شوره وماميش واحد!

لا يبه كلهم زينين، وكلهم قمة الخبرة، وكلهم كفاءات، واللي يقول غير هالكلام ترى ما عنده سالفة، وخل يدور له ديرة غير هالديرة.

ارتحتوا الحين؟!