#جريدة_الآن روابي البناي تكتب : حية رمل..!

القبس
صباح السعادة والخير يا قراء الخير، صباح فبراير الخير اللي فيه بشاير الخير، شهر يديد ومميز علينا كلنا ان شاء الله يكون شهر خير من اوله ليمن اخره عليكم وعلى كل من يعز عليكم يا وجيه الخير.
قبل لا ابدى بهذرة اليوم ودي افسر العنوان اللي اخترته واللي ماخذته من كلمة كويتية بطن وظهر مثل ما يقولون، فكلمة «حية رمل» باللهجة الكويتية، حسب ما فسرها المؤرخ الكويتي الشيخ الراحل عبدالله النوري في الأمثال الدارجة وتفسيرها لمن يتظاهر بالمسكنة والصلاح وهو غير ذلك.
وللأسف ان وطن النهار متروس ومغبط من هالفئة اللي ربي بلانا فيها، باختلاف التخصصات والمسميات والمستويات، وطبعا وايد من هالفئة عندهم هالمراوغة والمخادعة شي جدا طبيعي وعادي لأن الرزق يحب الخفية على قولة اخوانه ابناء النيل العظيم.
اليوم ماراح اتكلم عن كل هالفئات وراح اركز على اهم واخطر فئة فيهم وهي فئة مثلما يقولون المدعين بالتأسلم، واللي تعتبر فئة خطيرة لزوم انحط بالنا منها لأنها ماخذة من اسمى شيء بالوجود ذريعة لها للوصول الى مبتغاها وأهدافها، وطبعا لهم اشكال وارناق لو بعدد انواعهم ما راح انخلص علشان جذي بذكر لكم اخطرهم.
الإسلام السياسي
هذا النوع اقل شي اقدر انعته فيه انه مثل الكوبرا قرصتهم والقبر، اسم الله عليكم، بتقولون اشدعوه واشلون؟ لأنهم يتحكمون بمصالح وسياسات في بعض مؤسسات الدولة، وعلى سبيل المثال لا الحصر، بعض الإخوة المتأسلمين بعض اللي اوصلوا بفضل صراخهم وتحمير عيونهم، خاصة اللي يموتون على «شوربة العدس»، فهالنوع اذا تذكرونهم أيام الانتخابات ما بقى شي ما اطرحوه وتبنوه، ولا بقت مشكلة ما حلوها ولا خلوا ولا بقوا وعد ما اوعدوه حق ناخبينهم، بس كل هذا ذهب مع الريح على قولتهم عقب ما اطلعت النتيجة وفازوا بالصفقة السياسية اللي ابعادها وايد اكبر من مصلحة الكويت واهلها.
شخصيات متأسلمة
هذي الفئة يندرج تحتها البعض ممن يتاجرون بالدين، للأسف، واللي تعتبر المكتسحة شعبيا، لأنهم اعرفوا عدل اشلون يدشون بدهائهم كل بيت ويسوون غسيل مخ حق الشباب، طبعا ما أعمم، لأن اكو دعاة الواحد بس وده يكحل عينه بشوفتهم من السماحه والشراحه اللي اهم فيها، انا اقصد الشرذمة من بعض الشخصيات التي تأخذ من التمسك بالدين ستارا لها ولافعالها وتتكسب من وراه، خاصة نوعية اللي بين ليلة وضحاها قاموا من النوم وخذوا مقص حديقة بيتهم وقصملوا دشاديشهم، وعقب قالوا قال الله وقال الرسول وحرام جذي وحلال جذاك.
وبالمقابل، بينه وبين ربعه تلقاه اشطن الشياطين وشوفوهم بالمجمعات والقهاوي عينهم تقول رقاص الساعة من كثر ما تروح يمين ويسار على الحريم ومخوزرهم، هذا غير انهم ما يعرفون الشرع والدين الا بالزواج على حريمهم، الصراحه شي صج يفشل.
خليط
عاد هذا النوع شكل تاني حبك انت، على قولة الست ثومه اللي اشوه انها راحت عند ربها قبل لا تشوفهم جان انجلطت، فهذا النوع الله يسلمكم من خليط من النوعين اللي قبلهم بس على اكشخ شوي وثقافة زايده شوي، هذا غير تسبل العين اللي شاطرين فيه واشلون ياكلون اللي جدامهم بالحجي المصفصف والملقى اللي يخلي الواحد ينبهر، بالمختصر نقدر نقول عنهم «هاي كلاس».
فمثل ما الكل عارف ان الكويت ولادة بالمخترعين والمبتكرين والمفكرين والمبدعين، وازيد عليهم مدعي المثقفين اللي مع كل مطلع شمس نلقى طالع لنا اسم مدرب حياة يديد، ومعالج لأمور الحياة يديد، ومدرس يدرسنا اشلون انعيش حياتنا بسلام داخلي وايجابية وسعادة يديد، هذا غير اللي عندهم مفاتيح بوابة الراحة النفسية اللي يقصون فيها على خلق الله اللي ينقوهم نقوة بعد ما يعرفون النون وما يعلمون عن حياتهم وعن نقاط ضعفهم.
قصدي هالمعالجين ومدربين الحياة المثقفين اللي عندهم شهادات طولهم، ودشاديشهم بالنسبة للرياييل، ومحجبات باختلاف طريقة لبس ولون احجاباتهم وثوربانداتهم وعبيهم، للأسف انهم اوصلوا لمرحلة وايد متقدمة من التدخل بخصوصيات الأوادم اللي افرضوا عمرهم فرض عليها أكثر من فاشلين السوشيال ميديا. طبعا مو كلهم فلو خليت خربت.
إشـــــلون؟
بتقولون اشلون؟ وشالتضهول روابي؟ بقول لكم لا والله لا تضهول ولا شي، واحد من الهاي كلاس اللي على قولتهم متى بنوا القصر قالوا امس العصر، من اللي دش له جم دوره عن طريق النت وحضر له جم محاضرة حق مادري اي دكتور، وعقب حصل على شهادة مدرب حياة وما يندرى صجية ولا مضروبة، حالها حال الشهادات اللي متروسة بوطن النهار امسوي اعلان حق دورة يديدة فحواها انا شخصيا اعتبره وايد خطير ووايد دخيل على مجتمعنا، فالدورة اعلنها هالجمبازي واهو متقمص بحة صوت المرحوم يوسف المطرف واهو يقول نسيتك انا نسيتك خلاص، والموجه للعنصر النسائي في وطن النهار فقط يقول فيها: سجلي عندي وانا بوهندي، لا تحاتين تدشين امقلدمة تطلعين حلجج دبل كلوش من كثر الضحك اللي انتي فيه لأني راح اعطيج مفاتيح واسرار اشلون اتخلين ريلج يستانس؟ وراح اعرفج على الأسرار اللي تسعد الزوج. هذا غير اشلون هالجمبازي راح يعلم هالحريم اذا كانوا يعانون من نقص ازواجهم اشلون يبلغون رياييلهم وبأي طريقة.
فللأسف، اننا وصلنا لهذي الدرجة من انتهاك الخصوصية؟ فعلى حسب علمي وعلى اللي علمونه اياه اهلنا وتربينا عليه ان للزوجية خصوصية خاصة جدا، ما يجوز لأي كان التطرق لها لا بهالهمز ولا باللمز، فاشلون عادي عندهم هالأمور؟
والمضحك المبكي انهم يشترطون على حضور هذا النوع من الدورات انهم اييبون عقد الزواج او ما يثبت انها مخطوبة علشان درء الفتن على قولتهم، الصراحة قمة الإبداع.
أنا والعياذ بالله من كلمة أنا ماني متعمقة بأمور الدين، ولكن عندي قناعة تامة بأن هالأمور تعتبر خط احمر بين الأزواج ومو من حق اي كان اقتحام هالخصوصية، فاشلون انتو اتسوون هالدورات وتشرحون الطرق اللي تسعد الزوج.
ممكن إجابة؟
كذا سؤال اتمنى يجاوبوني عليه علشان بس اقدر استوعب وعقلي ما يزر ولا اروح من جيس اهلي اسم الله علي:
• وينكم من جزئية طاعة ولي الأمر اللي ما مشت على هواكم تعنفقتوا؟
• وينكم ما تفسرون ذرعانكم وتلاقون لنا حل حق مشكلة الطلاق بالكويت اللي صارت اسهل من شربة الماي كل يوم ووصلت معدلاتها كل يوم 22 حالة طلاق؟
• وينكم من الأسر المتعففة بالكويت والتي تعيش على الله وعلى المحسنين ومحد درى عن هوى دارهم غير ربي سبحانه واهل الخير لأنهم مو من ربعكم؟ ام ان التبرعات والصدقات بس تتوزع على ناس وناس؟
• وينكم من ربعكم المزبرين بالمجمعات الليما عندهم لاشغل ولاعمل غير امخوزر الحريم وهم يفركون اضروسهم المقطنه بمساويجهم؟
• وينكم من بعض ائمة المساجد اللي يتصيدون كبار السن وضعاف النفوس ويروجون للزواج الثاني من قريباتهم بحجة ان الدين حلل اربع.
• وينكم ياللي اتحاضرون بخصوصيات الزوجية من التطرق للمشاكل الاجتماعية التي يعاني منها المجتمع الكويتي كانتشار المخدرات والتحول الجنسي ونحشة البنات من بيوت اهلهم؟
• وينكم عن ربعكم بعض تجار الإقامات اللي كل واحد لحيته ليمن سره أحيانا واهو كافل مليون واحد وهادهم بالشوارع يمرحون ويرتعون وتارسين الديرة مشاكل وبلاوي.
• وينكم عن ربعكم اصحاب القهاوي اللي يتصيدون بنات الجامعة والمعاهد الصبح ويقدمون لهم الشيشة بنص السعر واذا كانت القهوة متروسة يخلونهم يقعدون بلاش علشان الوضع يصير كازينو الليل.
أتمنى ان ألاقي اجابات حق تساؤلاتي جزاكم الله خير.