تحل بالصبر وتنفس عميقا

نسيت لا اقول لكم يوم كنت ألف السبع لفات بمدارس الجهراء على الكتاب المطلوب رأسه لأبلة بنتى .. لفت انتباهى واحد حالته مثل حالة العبدلله وين ما اروح ألقاه جدامى او انا اسبقه .. ومن هذا المنطلق والتقاء المصالح اللي نركض لها عزمته على فنجان قهوه ما صدق خبر ابن الحلال طاوع وقال تم ولحقنى للديوانية وبعد تقديمه لرواد الديوانية تم خلالها دحرجة أحلى السلامات الحاره لضيفنا الجديد .. قال العود : من بعد اذنك ياضيف نقلب صفحة السلامات وندخل بالمفيد .. بلدنا حفظها الله تغيرت ميه وثمانين درجه من الاحسن الى الاسواء بكل شى وخصوصا وزارة الداخلية ايام قبل إذا قالوا شى على طول يتنفذ برسم الخدمه .. ابتسم الضيف وقال : ياعم هذا على زمانكم اما اليوم اللى ماكلينها الافراد وطايحه ببطون القاده كل شى لهم وحنا خلف الله علينا .. دليلك لو ما عليك واحد امر .. خذ عندك ياعم نوط الخدمه قام يتأخر علينا بدون اثر رجعى مثل قبل لعل المانع خير  .. وعندك مكافأة الانتخابات صارت مثل حكايات ألف ليله وليله كل واحد يدلى بدلوه اليوم باجر وحنا على هالحال لباجر .. هذا غير بدل الخطر اللى خرج للدراسه ولم يعد والعهده على الروات ان الحرس والجيش اقروه وحنا لازال ومازال وللان ولغدا وبعد عقد من الزمن  يدرس ويدرس ثم يدرس .. واما بخصوص اللبس يا خزياه على قولت ممثلاتنا هالايام وعليهم ردحه شاميه شى  بيخزى العين اول ما تحوشه نقطة ماء تطلعله ريحه أعزكم الله ومع هذا محنا محصلينه مقاساته اما كبيره او قياسات ولاديه .. لاحول الله كل هذا موجود بالداخليه قالها العود .. واللى يرحم والدينك ياحجى خلنى اكمل وافضفض قبل ما ابجى من القهر .. لا يابوك كمل المايك معك وياليت الاخ المخرج يقطع الصوت عن الجميع .. جزاك الله خير ياعم انا على حسب علمى ومعرفتى بأفراد من الاداريين السابقين من اللى انزلوا الى الزامات مامشت علاواتهم المقرره وقبل ما انسى الطوابير اللى فوق الزام حالها حال مكافأة الانتخابات ما من شى .. واشطوابيره يابوك قالها العود .. المقصود من الطوابير هو حفظ العسكرى لا امن المباريات والرالايات والمدارس والأعياد وأخرها ندوت المعوقين اللى غاب عنها المحافظ .. صوت خافت جدا كله من زحمت الشوارع .. من الاخر حنا نسوى كل شى والواحد منا يقوم بأشغال خمس افراد من النقص اللى قام ينخر بأوصال الداخليه والجماعه لاحس ولا اخيه خبر الظاهر ان الاذن اللى يسمعون فيها نايمين عليها .. بس يابوك عورت قلبى على حالكم اسأل الله ان يحل مشاكلكم ومشاكل الكويت كلها اللى قامت تكثر بهالايام يا دافع البلاء كل شى صار مشكلة عندنا واخرها مجلس الامه يقولون احتمال يلعبون لعبة الكراسى الموسيقية على كرسيين وانصحك يا بوك بالتحلى بالصبر والتنفس عميقا وتطليعه متقطع .. وبهذى الاثناء سمعنا صوت الشيخ زغلول ينادى بصلاة الظهر لنتفرق بحفظ الله ورعايته على امل لقاء قريب.