نواف الفزيع: تدافعون عن جابر المبارك وهو من قال عن الصامدين خونه

صدام بارت تو! كتب:المحامي نواف سليمان الفزيع ولدي الصغير توه يعرف يقرأ ويكتب.. شاف جريدة »الوطن« وسألني (شنو يعني ولي عهد الشيوخ والفداوية.. يعني الحين أكو بابا مسلم؟) بالله شرد عليه، جاوبني يا بو حمود، شنو تبينا نعلم عيالنا؟ ان الولاء لمسلم البراك والكويت؟ انا كويتي بسيط ما افهم في كلام القوى التقدمية بالكويت وجرايدهم، فكلامكم التقدمي وجملكم الرنانة اكبر من مستواي الفكري، واللي عشته وبأعيش عيالي عليه انه احنا بالكويت في عهد بابا صباح وبابا نواف، في شي صاير غير هذا؟ اللي اذكره انه صدام اول ما دخل الكويت قال نفس هالكلام، فهل معنى هذا ان هناك انقلاباً على السلطة منك ومن ربعك، يا ريت تعلمنا، وتكفه نبي صورتك انت والسعدون، كل واحد ببشته عشان اعلقها بديوانيتي! انت مناسب الشيوخ وعيب تهينهم وفي ناس آباؤهم كانوا فداوية شيوخ (وانت تعرفهم زين) وكلامك هذا زعلهم! لا تنسى انه في ناس الشويخ لهم فضل عليهم وصلتهم مجلس الامة وصرفت عليهم وعيالهم صاروا معارضه بعدين، يعني لحم اكتافهم من خير الشيوخ وهالناس تعرفهم زين يا بو حمود وكلامك هذا زعلهم لأنك صورت الشيوخ بأنهم عار عليهم، وان الفداوية عار لمن كان ابوه فداوي وقف مع الشيوخ وحمى الكويت في عهد معركة الصريف ومعركة القصر الاحمر، لا تنسى التاريخ يا بو حمود واللي ينسى تاريخه عمره ما فيه خير، في الجلسة يا بو حمود صرت بطل على الشيوخ عشان موضوع احالة الشيخ طلال رئيس الكويتية للنيابة العامة، طيب شكو الشيوخ بهالموضوع؟ الكويت دولة مؤسسات والقانون فوق الجميع شيخ ومواطن وانا معاك في جهدك الذي اثمر احالة رئيس الكويتية للنيابة برافو عليك بس على ذكر القانون وينك انت من جلسة احالة تقرير ديوان المحاسبة الخاص بمدير البورصة للنيابة العامة ليش وقفت ضد الاحالة للنيابة العامة؟ ولا بس الشيوخ اللي يتحولون للنيابة اما ربعك فوق راسهم ريشة.. ما سمعنا حسك على مدير البورصة السابق بل وقفت وقمت بالتصويت ضد الاحالة للنيابة، الظاهر ان القانون عند مسلم البراك يمشي على الكويتيين شيوخاً ومواطنين ما عدا ربعه وعيال عمه، هذولا ما يتحولون النيابة (حسب عرف مسلم البراك) حتى لو صادر ضدهم تقرير من اكثر من 125 صفحة من ديوان المحاسبة يدينهم. ما علينا، في شي انا ملاحظه على كل من يهاجم الشيوخ هالايام تدرون شنو؟ لاحظوا معاي، مسلم البراك ابوه (الله يرحمه) كان عضو مجلس امة حكومي ومقرب عند الشيوخ، عادل الصرعاوي ابوه (الله يرحمه) وزير وحكومي ومقرب عند الشيوخ، مرزوق الحبيني عضو بالمجلس الوطني (يعني مع قوى الفساد والشيوخ.. مو؟!) يعني كل من يغلط على الشيوخ هالايام، آباؤهم أو هم انفسهم لهم تاريخ مع الشيوخ ويمكن هذا الشيء ولد احساس بالنقص عندهم، وخلى الشيوخ عقدة عندهم وزيد على هذا اللي مناسب الشيوخ وابوه مقرب منهم شراح يصير فيه، سؤال احيله لأي واحد متعقد من الشيوخ. الشيء الثاني اللي لاحظته هذي الايام احساسنا ان احنا في غزو ثاني، صدام قال عهد الشيوخ ولي ومسلم قال نفس الكلام، صدام شال اسماء المناطق المسماة بالشيوخ، وكؤوس الرياضة المسماة بالشيوخ لغاها صدام الجديد وربعه، صدام لف الاكو والماكو وصدام الجديد وربعه باقوا الديرة وقعدوا، في الغزو الكل بايع الاسرة والكل نادى فيها على الرغم من الخلافات السابقة، بعدما شافوا القهر من صدام وربعه والحين الكل ينادي بالاسرة الزين والشين، بس يبقى الاحترام ويبقى التقدير ويبقى اننا نحن في دولة مؤسسات لا يعاب فيها الشخص لأنه شيخ أو مواطن بل يعاب على خطئه ان اخطأ وخطؤه لا يمتد لأهله يا بو حمود، الا لمن اراد ان يفرغ عقدة النقص اللي فيه.. والله احبك واتمنى لك الهداية بس اللي قاعد تسويه كايد يا بو حمود، ارجع يا بو حمود اللي نعرفه، الشخص الوطني ووخر عن ما غيره ياما نصحتك فيه، اللهم اني بلغت.. اللهم فاشهد، بس دام قدوتكم واللي تدافعون عنه من قال ان الصامدين خونة بنترجا منكم خير.. ما ظنتي! ملاحظة: (نحن معتادون على التنكر امام الغير.. ولكن في النهاية سنكون متنكرين امام انفسنا) فرانسوا دي لوركا.