لميس وخبزة التميس

بعد ماخلص هالشهر الفضيل اعاده الله علينا وعلى جل المسلمين على راى معلقينا بالعروبة اهل المغرب العربى بكافة دوله .. اجتمع اهل الديوانية بعد انقطاع وبعد التهانى واختها تبريكات بين الحضور بعيد الفطر السعيد وهمن لكم ياقراء .. قال عود الديوانية والله لكم وحشه ياجماعة الخير اهه قم يابوك فر الدخون على عمامك .. طيب الله عملك .. عملنا وعملك يالله عاد خلونا نشوف اخبار جرايدنا اللى صارت اكثر من الهم على القلب كل جريده تجى قالصه معها جريده ثانيه يالله شوفولنا واش اخر الاخبار .. قال واحد من الحضور واشلك بالجرايد واخبارها وتجميعها وليه المخاسير على كل هالجرايد ترا جريده وحده كافية لاانهم مثل ممثل ماله وصف إلا بيوت الكوريات ايام عزها .. ياوليدى مشكور على النصيحه بس نبيك تشنف أذانا بالاخبار يابو الاخبار .. والله الاخبار اللى بين يدى ماتسر .. افا قل غير هالكلام واشصاير ياعله بالعدو ماهى بالصديق .. ياجماعة الخير البلد مقلوبه مابها غير اخبار الهوشات بين الشباب تاره وتارتا اخرى بين النسوان .. لاحول الله الشباب موكافى اشاعات مهند والست مرجانه قصدى لميس اللى راجه الكويت كل يوم هم بمجمع بأحد مناطق الكويت .. صوت خافت باحد اركان الديوانيه بكل شهوانية ألا واهنى من لمس ايدها ويامحاسن الصدف جاء مع الصوت صوت طرااااق لج وزلزل وقلب كيان سبعة عاشق لميس .. اللى قال توبه ياعم انا على بالى يتكلمون عن خبز التميس اللى احبه موخبز خبازنا الافغانى اللى خبزته جنها مهفه من يبسها .. ضحك الجميع على لباقة الشاب المتأخره .. ماعليه نرجع الى دريم حديثنا الشباب لهم العذر اغلبهم متهور ومسيطره عليه عقلية المراهقه .. بس الغريبه سالفة الحريم اللى مالها والى دايره من سوق لسوق ماأدرى وين ولى امرها عنها .. بصراحه الحال بالكويت صارت مقلوبه الحريم تقز الشوارع واغلب الشباب قاعدين بالدواوين .. ولااجل ذلك يجب ان تدرس الحكومة الموضوع وتشوفلها حل لان كل اللى يجرى لها فيه علاقه .. قال احد الحضور ياسلام واشتبيها تسوى .. مثل الناس على الاقل تكثف رقابتها على الاعلام ومسلسلاته اللى تارسه الفضائيات ماكو محطه إلا وفيها واحد من مسلسلات بلدنا وتعال ياخراب من وراها بقصص ولا حتى بالاحلام .. حسبى الله هو نعم الوكيل ماورها إلا الدجه والسمعه اللى ماهى حلوه عند العالم العربى على بالهم ان هذا واقع الكويت اللى جايب وراء .. وبهذى اللحظه اذن الشيخ ان كنتوا فاكرينه .. ايوا الشيخ زغلول حبيب الكل بأذان الظهر بعد ان غاب عن نهاية حكايتنا بهالشهر المبروك  .    

 

 

[email protected]