دودهه من قلب

شايبنا ماصدق خبر ان جاه واحد من شباب الديوانية اللي عندهم خلفية تعليمية على حسب فهمه لانه معتقد ان كل الشباب مثقفة, ناسي ان بعضهم مايدري وين الله قاطه, بس واشنقول هذا تفكيره والسلام وهو حر فيه, قط الجريدة عليه وقاله افلها وعطنا علومها . رد الشاب وهو يضحك ابشر بعزك لو ان الجرايد مثل بعض اليوم وباجر وامس اللهم الشي الوحيد اللي فيها يتغير هو اسماء الوفيات كل يوم ناس مودعة غير واما باجي الاخبار حال بحال على رأي بهلول حلاق شارعنا المغربي, وبهذي المناسبة اباركله بالشهر الفضيل, عم عطية ماهو احسن منا, وهو يعلق على دورة الروضان , وانت الصاج قالها واحد من الموجودين وعداك العيب جرايد هالايام ماتبشر بخير صفحاتها اللهم ياكافي مناشدات وسرد مشكلات الوطن والمواطنين وقصايد مدح للي يسوى وماني قايل اللي مايسوى علشان حنا برمضان , بصراحة حال البلد وناسه يدوده, ناس ماعندهاش حاجه تبي الفزعة من ناس عندها كل حاجة وهي ماهي محتاجة وهنيالك يافاعل الخير, وصدقه قليلة تمنع بلاوى كثيرة, وكل هذا كوم واسماء راعي الدورية وراعي الاسعاف اللي قمنا نشوف اساميهم بالجرايد بتقليعة جديدة, قال اللي ماسك الجريده لاحول الله الكل بالكويت يشتكي اللي من الصحة واللي من التربية ومدارسها اللي ماهي جاهزة واللي من وزارة الكهرباء وانقطاعاتها المتكررة بأوقات مش اللي هيه,واللي من النظافة وتقصير البلدية من هالناحية واللي من ناحية ثانية تفكر بأزالة المظلات بعد الدواوين, واللي من الاشغال وشوارعها المكسرة واللي من ملابس العيد اللي شابه ضو بلا حسيب ولا رقيب من التجارة على حارة كل مين ايده له اهل المحال, واللي الطلب الحكومي بالتستر على اسماء تجار الاقامات ياربي واشكثر هالمشكلات, اضاف الشايب لاتنسى البورصة, وصور اهلها اللي تقطع القلب بالجرايد إلا يابوكم هو صج ان سعر الاسهم صار كل شي بمية فلس, واللي هي شقاوة تجار مفلسة, ما اقول إلا ياهنى الجهال واهلهم اللي متجمعين عند مدفع الافطار يطاردون شاشة التلفزيون ويأشرون بيباي لاهلهم مع انهم معاهم ماعلينا, مع كل هذا فيه حاجة تقرقع بقلبي واللي هي كثرة الصيدليات بالجهراء, وياسيف وحياة ابوك كلم مصفف الكلام مايجيب عاليها واطيها مثل المقالة اللي راحت, عفوا اعزائي الحضور على هذي الشطحة غير المتوقعه بس لزم التنويه فيها, انت ناسي انه حنا بدولة حضارية قالها واحد من الحضور, وهو يضحك, بس اللي فاقع غشاء مرارتي هو الحكومة قاعدة ليه ماتقوم تروح مع هالكم الكبير من المشكلات ليه مايعتذرون عن الوزارات مادامهم ماهم قادرين يسوون شي.
فجأه ارتفع صوت التلفزيون بأغنية كلنا للكويت والكويت لنا والجميه يقول كلنا عقب ماأصابع الشايب ضغطت بخبث على جهاز 'الرمونت كنترول' اللي بجنبه علشان ينهي موضوع هذي الليلة المباركة اعادها الله هي وشهرها على الجميع بخير وسلملم ياقراء .
.

محمد خلف الشمري
[email protected]