طراق غني بوسط الزحمة

 المشهد الاول نهار خارجي لقطة عامة على منطقة الاسواق بالكويت والكاميرا تتجول بينهم تطلع من سوق وتدخل بالثاني والمتسوقون كلهم فرح وسرور اللي مبتسم ,واللي يسوي حركة بيباي وهو يحاسب راعي برد اللي يبوس ايده وجه ولحية
المشهد الثاني داخلي كلاكيت للمرة عشرين بسبب تجمهر العواطليه والزقرتيه, داخل احد الاسواق زوووم بمدربان المجمع على محل مشهور عنده تنزيلات مكسرة الدنيا وحركة الناس فيه غير طبيعية وكثيفة حرمه داخله ومزه طالعه بكيس تعطيه الحمالي وراها كم لطيف .. تدخل الكاميرا المحل المزدحم بصعوبة وياسلام على الزحمه اللي فيه وتاخذ لها كم كتف قانوني وغير قانوني بطريقها على انغام توجع من المتسوقين وماهي خاليه من مسبة الوالدين على كم لقب حيواني وفجأه نسمع صوت صاحب المحل وهو يصارخ وسعوا ياناس شوية هواء عدي يامدام والكاميرا تتقدم ببطء وسط الزحمة وفجأة تاخذ لها ضربه من يد واحد متعافي الامر الذي يجعل حاملها يقلبها من قو الضربة فتظهر ارضية المحل ورجول المتسوقين ونشاهد ايد لشاب يطبق ورقة ويرميها على الارض وايد بيضاء نسائية تنزل في تردد لتأخذ الورقة .. وتعود الكاميرا الى وضعها الطبيعي ويظهر احد الشباب يتجرر على مايبدو بعلج وتنتقل الكاميرا لوجه بنت شعرها منكوش والميك اب سايح من الحر والزحمة وباين عليها الضيق الزعل بان فيه احد مزعلها .. وتتقدم الكاميرا للامام حتي تصبح جدام فرت الكاشير ومن ثم بدأت بالدوران حوالين ارجاء المحل واثناء دورانها نسمع صوت صرخة مره من اخر المحل وصوت طراق اعقبه هوشه والناس تحاول
التفريق والفرجه ونسمع اصوات تتعالي .. صوت 1- شنهو هذا ليش قلة الادب هذي ? .. صوت 2- لاحول الله الدنيا تغيرت وين الحيا الله يرحم ايام اول ? .. صوت 3- هذا نتيجة دلع هالايام كله من الخواجه فلانتين وعيده الله لايعيده ضيع الشباب  .. وخلاهم مثل ثيران حلبة الماتادور كل همهم اللون الاحمر ولا غيره ماهم لاقين شغل وماهم عارفين شيسوون غير مطارد حريم خلق الله وازعاج العالم  ! .. ترتفع الهمهمات معترضة .. صوت 2- هذا مايخلينا نبرر لهم الغلط .. صوت 3- انا ماابرر غلطهم انا اقول السبب , لكن انا طبعا ضد اللي صار .. صوت لجاهل :عنده مشكلة ما بأسنانه بابا بابا سنو فيه? .. اصوات تضحك .. صوت 2- ماكو شي واحد ضرب الحرمه ام احمر وعلشان جذي بجت .. صوت 3- وليه ماتقوله الصج بلاش من اللف والدوران تبي تعلمه الجذب من صغر ? ..
اصوات تضحك, صوت 2- اشلون جاهل اعلمه هالسوالف ? هذي تصير قلة ادب, يظهر على الشاشة وجه شاب ملتحي يتأفف ويتمتم : استغفرالله العظيم .. صوت حرمه :
ياجماعة غيروا الموضوع وفكونا, لقطة اعتراضية من الكاميرا على لوحة بالمحل مكتوب فيها عفوا البضاعة لاترد وتستبدل خلال ثلاثة ايام, وبعدها لقطات سريعة من الكاميرا فم الشاب لا زالت تمضغ العلج, بنت تضحك وتغمز لصاحبتها وتاشر على واحد, تنسحب.
الكاميرا ببط تخرج من المحل ويطلع لنا كادر النهاية اللي يشكر كل من ساهم بانجاح هذا العمل من اكبر واحد لين اصغر فرد ومن اسمن شركة الى بياع البرد اللي واقف على زاوية السوق وطلع بلقطة خاطفة .