الهاملي يعتذر للكويت

المعذرة يا ديرتي يا الحزينه
صرتي بتال الوقت  لي مصدر أحزان 
 المرتشي الغشاش فعله إيزينه
 وفيك الحرامية رموز ولهم شان 
الفاسد البواق يعطى الخزينة
 وإن زاد بوقه صار له ربع واعوان
واللي سكت وطأطأ برأسه تبينه
   لو كان رعديدٍ وفاسد وجابان
 والمدعي بالدّكتره ترفعينه 
يحمل شهادة علم زورٍ وبهتان
 يتسيد المنصب ويا قو عينه
 والدال قبل اسمه ( بلا علم ) عنوان
 والنذل يجلس بينهم مكرمينه
  صار الجاهل في نظرهم كحيلان
 وسماحته ينعق وينبش ضغينة
حنا شكو ما بين مشهد وطهران؟
 واللي صرخ من الألم تشمتينه
    وقلتي عنه هذا مؤزم وفتان
 واللي يبي درب السنع تدقرينه
  ويضيع حقه في ربوعك وينهان
 وين العقول الراجحة و الرزينة
   العدل أساس الملك في كل الأزمان
 وصرتي علينا يا بلادي ضنينة
   أبو حقب يفرس والحر جوعان 
   أقول هذا يوم شفت الغبينه
أشوف أنا حقي على كف شيطان
 ذنبي لأني ما أسوي المهينة
 ولا هو من طبعي ظلوم لإنسان
  والعمر كله خِدْمتي فيك زينه
 ولا أسوّي الفحشا ولا ني بخوان
  و تاريخنا في تُربتك خالطينه
  ومعجون مع طينك وهذا الذي كان
 ننبت مع الثّندى وسدرك شزينه
ورمثك مع العرفج  ونوّيرك ألوان
 وجدي وبوي بتربتك دافنينه
  وأمي مع الخالة عساهم  بالأجنان  
 واليوم أنا أشوفك كئيبه وشينه
  وحتى (الكبير مبارك العود زعلان )
 من الأفق ينظر في عبوس وسكينه
   ويقول ما هكذا يا عيالنا تبنى الأوطان
 وعبدا لله السالم بعقل فطينه
   شرع لنا الدستور في بلادنا أركان
  ربان ماهر قاد فينا السفينة !
  وينخا على الدستور عظّوا بالأسنان 
  المعذره  يا ديرتي  يا الحزينه
  صرتي بتال الوقت لي مصدر أحزان
محمد بن جبران الهاملي