أصالة تهاجم 'بشار' بأغنية جريئة:

تطلق المغنية السورية أصالة نصري خلال أيام عيد الفطر المبارك، أغنية جديدة تعتبرها 'بمثابة معايدة للثوار في بلدها'، كما نقل العديد من المواقع الإلكترونية، من بينها 'شباب الأهرام'.

كذلك يبث موقع يوتيوب 'برومو' أو إعلاناً، للأغنية التي تحمل عنوان 'آه هالكرسي لو يحكي'.

وتقول كلمات الأغنية التي تخاطب الرئيس السوري 'كل الكراسي تكسرت، من دروسك تعلم، كل العلم ما بينفعك، والشعب بطل يسمعك، وكل القتل ما بينفعك'.

وتضيف الأغنية التي لحنتها أصالة بنفسها ووزعها حسين النجار، 'سكتنا كتير عالظلم، لا تقول ما عندك علم، لما الجرح علم، بدي بصراحة انصحك، تبقى ما رح تزبط معك.. نحن انقهرنا والقهر، خلانا نتعلم'.

وكان الجمهور السوري المعارض بانتظار عمل فني مشترك، أعلن عنه عازف العود العراقي الشهير نصير شما، يحمل عنوان 'الشعب يريد'.

والمغنية السورية، هي مثار تجاذب بين مختلف الأطراف، هجوم من قبل الموالين للنظام السوري، وتأييد ودعم من قبل معارضيه، الذين باتوا يسمونها 'مطربة الثورة السورية'، وذلك منذ أطلقت تصريحاتها المؤيدة للثورة السورية في منتصف مايو الماضي، حين وجهت 'رسالة إلى ثوار سورية'، تناقلها العديد من المواقع الالكترونية.

فهي أعلنت فيها رفضها السفر إلى سورية للمشاركة في 'تمثيليات دعم نظام بشار الأسد'.

وقالت 'كيف لي أن لا أشعر بأهلي ولا أرى ما يحدث ولا أسمع صراخهم، الذي زلزل قلبي وعقلي وكاد يخترق روحي'. وختمت رسالتها بالقول 'ليتني معكم لأصرخ حرية بكل صوتي'.

وتقول كلمات اغنية أصالة الساخرة:

آه لو هالكرسي بيحكي
 كان بيصرخ كان بيشكي
وبيتأفأف وبيتلوع
ويمكن حتى ينوح ويبكي

******

هالكرسي عايف افطاسو
ماحدا عم بيعبي راسو
وكلو بيتغنى بإحساسو
وبالحقيقة كلو بيحكي

******

هالكرسي بيعمل عمايل
بيعمل للأصلع جدايل
بيخفي لصحابو الرزايل
بركي بيصحو مرة بركي

******

عالكرسي صاحب معالي
سيفو على شعبو بيلالي
وبيعمل حالو نضالي
وبالمخفي عم يشرب وسكي

*******
واللي بيقعد ما بيتزحزح
ما بيتحرك ما بيتلحلح
وبأحلامو بيطير بيشطح
وبيقلك هالكرسي ملكي

*******

ما بيتنازل عنو أبدا
ما بيتخلى عنو أبدا
وبيتمنى يضلو أبدا
مع أنو ما بيعرف يحكي

*******

هالكرسي بطل يتحمل
والباشا كل مالو بيتقل
ولما الكرسي قالو ارحل
صار الباشا ينوح ويبكي

********

آه لما الكرسي بيحكي

وتختتم بموال:

كل الكراسي تكسرت .. من درسك تعلم

كل العلم ما بينفعك ...
والشعب بطل يسمعك
وكل القتل ما بينفعك .. كان فيك تتعلم

سكتنا كتير عالظلم ...
لاتقول ما عندك علم .. لما الجرح علم

بدي بصراحة انصحك ...
تبقى مارح تزبط معك .. لك روح وتعلم

شفلك حدا بيرضى القهر ..
ناسي الكرامة من دهر ..
نحنا انقهرنا والقهر ...خلانا نتعلم