مافينا خير يا فهد...!!

ماني متخيل ان لاعب يمثل المنتخب الكويتي ويلبس الفانيله الزرقاء وابوه خدم بالجيش الكويتي 40 سنة وللحين مو عارفين هل يستحق هو ووالده الجنسية واسرته ولا بعد؟!
 
مافينا خير اذا صارت اسرة اللاعب فهد العنزي تفرش الشارع كبيت لهم بعد ما تستلم وزارة الدفاع بيت ابو فهد بحجة انتهاء خدمات والد فهد للجيش الكويتي، وكأن البيت اللي راح تاخذه من ابو فهد فيلا على ثلاث شوارع ونص بالضاحية، البيت اقرب ما يكون صندوق في منطقة منسية اسمها الصليبية؟!
 
مافينا خير اذا قعدنا نشجع ونطامر ونصفق لفهد العنزي وهو 'يرقص' لاعبين الفرق المنافسة لمنتخبنا ويسجل الاهداف ويمرر الكرة لصنع الانجاز للكرة الكويتية واحنا عاجزين عن توفير بيت واستقرار ووثيقة تثبت ان فهد العنزي كويتي وقبل كل شي انسان!!
 
مافينا خير اذا اعتبرنا ان مهارات هذا اللاعب وقدراته الكروية هي السبب الوحيد اللي تخلينا نفكر في منحه الجنسية، ونطلع عديمي الضمير والاحساس اذا نسينا ان فهد واخوانه واهله من غير اي اثبات يدل على انهم بشر في بلدنا الكويت؟!
 
فهد او اهله اذا طاح مريض ما يقدر يدخل المستوصف يتعالج لأنه من غير هوية ولا اثبات؟!
فهد واهله ما عندهم القدرة على اصدار شهادة ميلاد لعيالهم لأنهم بدون!!
فهد واخوانه واهله رغم كل هالظروف يحبون هالارض ويعشقون ترابها وسماها...
 
احنا مافينا خير اذا نسينا ان في انسان اسمه فهد العنزي يحتاج وقفتنا في مشكلته الانسانية مثل ما اهو واقف مع منتخب بلاده اللي للحين مافي مسؤول تعطف واعلن ان هذا اللاعب ولد الكويت؟!
 
اخيرا فهد لاعب مميز وهناك غيره العديد من اخوانا البدون اصحاب المواهب وقبل مواهبهم هناك منهم من يحب ويعشق الكويت..
 
قضية البدون انسانية ..