اصرخ وحرّر كلمةٍ داخل الجوف

كثيرا ما أقرا أو أسمع بعد أي مشاركة 'بما قل دل' تعليقات مفادها ( قلت اللي في قلوبنا ).  استوقفتني هذه الجملة كثيرا: لماذا ننتظر من يتكلم نيابه عنا ؟  لماذا الخوف ومن ماذا ؟ حتى أن البعض يرفض أن يدور حديث سياسي في ديوانه ومع هذا يستعرب الخصخصة وصفقات التنفيع وتبديد المال العام في مشاريع فاشله لا تخدم البلاد ولا العباد:

خلاص يعني ليمتى يسكنك خوف ** ودّك تكلم بس خايف تكلّم

يضيع حقك وأنت واقِفْلِه أتشوف ** متى دخيل الله تحس وتعلّم

الصبر ماهو بكل الأحوال موصوف ** بعضه يجي من ضعف ياللي تحلّم

العمر مره والحقه قبل لا يطوف ** إن راح قلّلي عند منهو تظلّم؟

يسكت يدهر وإذا نطق شي معروف ** فوق الكفر بالفجر صاير معلّم

دام القضيه صارت مداحر كتوف ** ومستقبل عيالك تشوفه مظلّم

أصرخ وحرر كلمةٍ داخل الجوف ** قاوم ولو مره وكافي تسلّم

الأرض أرض الله وحنا بها ضيوف ** وش جابرك يا ضيف فيها تألّم

حمد المخيال