رحل خالي

رحل خالي و ترك خلفه جرح لن تبريه السنون....

رحل خالي و ترك خلفه فراغا لن يغطيه احد....

رحل خالي وترك خلفه...أنا! انا للي ماعرفت معنى مر الفراق الا  من بعد ما ذقت مرارة  فراقك.

خالي, انا ادري تحب تقرأ الجرايد كل يوم,تقراها الصبح و تعيد قراتها في الليل, لكن للأسف  هالمرة مراح تقراها,بس تدري؟ كل الناس  راح تقرأ وكلهم  بيدعولك بالمغفرة والرحمة بإذن الله...

يا الطيب, يا الحنون, ياللي  يسارك لاتعلم كم اعطت يمينك, يا راس مالي, يا عزوتي, يا سندي, ياللي  كل الناس اتفقوا على  حبك, يحبونك..اي واالله يحبونك, وانا احب  كل الناس تدري ليش؟ لان احب اللي يحبك..احب  اللي يحبك يالغالي...

اوعدك ما أزعل, شلون ازعل وانا كل ما طرى علي طيفك يجيني مبتسم! لان عمري ماشفتك حزين! حتى لو من داخلك حزن ما تبين, تكتم بقلبك عشان لا تضايق اللي حواليك....ياه لطيبة قلبك ياخالي..

طيفك  ووجهك السموح مايفارقوني اشوفهم بكل مكان بكل  زاوية, وصوتك اسمعه  يهمس بأذني, تصدق حتى  صوتك يبتسم؟! لأن عمري ماسمعتك حزين, اقولك تكتم عشان اللي حواليك...ياه لطيبة قلبك ياخالي

خالي, ترى كل زوايا بيتك تبكيك, تصدق حتى الخدم  يبكونك؟ يتقبلون  معانا عزاك! كلن  يبي يرد جزاك و  يوفيك حقك يا الملاك...

يا  الروح الطاهره..

يا  الوجه السموح..

انا ادري ان الموت حق,اللهم  لا اعتراض, لكن اسمحلي اقولك من بعد عينك يا خالي انا اعلن اكبر خساراتي...

الله يرحمك  و يصبرنا على فراقك

الله يرحمك يا خالي 'فهد لافي المطيري'

مثايل الديحاني