رشيد الدهام: الرسالة

هنا الشاعر السعودي القدير رشيد الدهام أحد الأسماء البارزة في ساحة الشعر الشعبي
يرسم الإبداع لوحة شعرية عاطفية ، في أسلوب تعبيري سهل ممتنع ،ينم عن قدرة الشاعر على استحضار الكلمات وتطويع العبارات بما يناسب الفكرة ،ليفضي بها إلى قصيدة متوهجة:

يابعد  كل الرسايل  هالرساله
توها ماكمّلت  عمر  الطفوله
طفلةٍ فيها العطر ياطول باله
وده يْفوح ويبوح وهي خجوله
مثل طبع اللي كتبها من دلاله
في مسافات الزمن واربع فصوله
دالهٍ لاجيت اشوفه شاف حاله
ماتهيّا  منْه  لو نظره  عجوله
صار عندي راس مال وراس ماله
ضحكةٍ معْها عقل بس مْهبوله
لاضحك في مسمعي كني قباله
كنت اقطف ورده وعقده ولوله
واحبس بعيني خيالٍ من جماله
وارفع لسمعي يدي كنّي باطوله
وارسم لزوله شكل يشبه خياله
في خيالي ولّا انا ماشفت  زوله
كلْ  ماحرّمته  القاني  حلاله
وكلْ ماعنْه ابتعد قربت انوله
كنت افكّر مره  القالي  بداله
دام وصله صعب والاصعب وصوله
قلت يالله  نفترق  كلٍّ  وفاله
قال يالله، قلت: لحظه من يقوله!
اطري الفرقا وانا مامن صماله
وادري ان فرقاه ماهي بالسهوله
كم عذولٍ قد عذلني في وصاله
ومن عذلني قلت له نفس المقوله
مايخلّي   حالة   الرجال   حاله
غير  بنتٍ  في  مواقفها  رجوله