جديع الملعبي: الليالي الخوالي

"الفعل يفرق عن جميع الاقاويل
ياهل الكلام المستعار الخيالي"

ليس القول إلا خطوات على طريق الفعل ، إما أن تتعثر فلا يصل الخطو مداه، أو يصل فيبلغ الشأو منتهاه، بخلاف ذلك تتطاير الأقوال ضرباً من الخيال.

الشاعر المتألق جديع الملعبي ومقدم برامج الشعر في الإذاعة ،يعود مجدداً ليصافحنا بنص رائع وان طال نسبيا فهو متكامل شعريا ، يتناول فيه رؤيته  الحياتية في العديد من الأمور، بروحية الشعر وعفوية الشعور:

ياهاجسي خذلك من الشعر تعليل
من يوم صار الشعر هو راس مالي

مانيب مغرم بالعيون المكاحيل
مغرم بتسخير البيوت الجزالي

قم ياخفوقي قنّد  الهم  بالهيل
ابتقهوى من هموم  الليالي

عسفني الوقت المضّرى على الميل
ماني  لحالي  مير   كني  لحالي

وا راسي اللي شال هم وغرابيل
وا صدري اللي صار ماهوب خالي

جريت في راس الطويله موواويل
لحني جنوبي والتفاتي  شمالي

الدمع ما الله خالقه للمناديل
خذ راحتك يادمع ف اول وتالي

ابعدت عن شوف العيون المعاذيل
ودخلت في رحمة عزيز  الجلالي

ياويل صدري يالضلوع المناحيل
لامن  تذكرت  الليال  الخوالي

اهل دمعي وازعج الصوت بالحيل
العمر  روّح  والليالي  طوالي

لامن لمحت سهيل لاتامن السيل
هذا  المثل دايم  لمثلي  يقالي

وانا لمحت البرق والجدي وسهيل
لاشفت  سيل ولا شربت الزلالي

كنت احسب ان الوقت كله تساهيل
الله  اكبر  يازمان(ن)  مضالي

يوم اني احب المشاوير ف الليل
اسري ومهجاعي بروس الجبالي

يوم اني اشعل للعيون القناديل
ماضيق في حلّي ولا ف ارتحالي

واليوم حتى  بالمفاهيم  تبديل
والناس غير الناس والوقت مالي

في هالزمن صارو شباه التماثيل
لا دمع سال ولا قلوب(ن) تبالي

احساسهم ميت ولا بحيلهم حيل
وكل(ن) على موال غيره يلالي

يانهر دجله وصّل العلم للنيل
ماكم هماجٍ عقب ماهوب حالي

لا وحسافه يالرجال الحلاحيل
قّلو وصار الوقت فيه اختلالي

الفعل يفرق عن جميع الاقاويل
ياهل الكلام المستعار الخيالي

والعذر ماينطح وجيه الرياجيل
والعلم ماينفع قلوب(ن) هبالي

وانا ادري ان الوقت ماله مداخيل
شماعةٍ   لاخطاءنا  اول وتالي

والامر للي انزل الذكر تنزيل
بامره يعز ضْعيف ويذّل والي