‫ناجي الزيد: القصة طالت وباخت وفكّونا من الكلام الفاضي ونبي كلام مليان الله يخليكم نبي فعل مو بس "قرقعة" إعلامية... اسردوا حقائق أو تحلّوا بالصمت رجاءً‬

على طريقة "إخِذْ وخَلْ" الوزراء والمسؤولين قاعدين يصرّحون:

سحبنا 60 قسيمة زراعية...

ألقينا القبض على تجّار إقامات...

الكمامات والدسوس توزّع مع التموين، وبعدين زادوا السعر %50، وما شفنا لا كمامات ولا دسوس إلى الآن... وننطر التموين!

هم "نزاهة"، الله يعطيهم العافية، دخلوا على الخط وصرّحوا بأنهم يحققون في قضايا فساد تم التبليغ عنها إلكترونياً، وغيره وغيره من الأمور.

ما شفنا أسماء، ولا درينا وين القسائم الزراعية اللي انسحبت، ولّا نسيتوا حتى قبل "كورونا" أن القسائم اللي يمرّ فيها مشروع القطار إلى الآن ما قدرتوا تحلّون مشكلتها، مع أنها أراضي حكومية... وبعدين مَن هم تجار الإقامات اللي ترددون إنكم قبضتم عليهم؟! ومَن هم النواب اللي متوسطين لهم؟!

ترى القصة طالت وباخت، وفكّونا من الكلام الفاضي، ونبي كلام مليان الله يخليكم، نبي فعل، مو بس "قرقعة" إعلامية... اسردوا حقائق أو تحلّوا بالصمت رجاءً. 

الشعب بأكمله أيّدكم وشجّعكم، وشكركم وطاعكم في كل الإجراءات التي اتخذتموها... 

لذا، آن الأوان لكشف الحقائق وترك الساحة الإعلامية لمسلسلات رمضان!