لماذا البيروقراطية بكل مكان في الدولة؟!.. يتساءل محمد الملا

الشاهد

ملينا من فوفو ونونو

محمد أحمد الملا

 

لماذا البيروقراطية بكل مكان في الدولة وبكل مؤسساتها الحكومية، بيروقراطية في الشؤون بالبلدية بمجلس الوزراء واعتقد انها متعمدة حتى تكثر الاوراق ويكثرون الطباعين اللي عند الجهة الحكومية ويكثر بيع الاوراق والاحبار والكل يتنفع والمواطن يدفع الثمن غير تخزين الاوراق في الارشيف وطبعا الارشيف يبي مكان فتضطر اي جهة حكومية لتأجير مباني تحت بند مخازن والكل يستفيد، لكن الهدف الثاني هو كثرة التوقيعات وبوس الخشوم والخدود وتقبيل الايادي والواسطات حتى تمر المعاملة، وللأسف كلها مخالفة للقانون وطبعا إذا كان مشروع طيب يفيد البلد يتم ايقافه بناء على تعليمات اصحاب النفوذ، لذلك ستستمر البيروقراطية في معظم الجهات الحكومية حتى الكل يستفيد، والكل يشاهد انتشار الرشوة في بعض الجهات الحكومية وخاصة الموظفين الغلابة رشوته كارت شحن تلفون بو 5 دنانير وداخل الكارت
20 دينار وكل حاجة تمشي غير الموظفين الذين يأخذون رواتب من بعض الشركات الخاصة حتى يخلصون معاملاتهم، وطبعا اللي عنده وكالة السيارات أو اجهزة كهربائية عمر شغله ما يوقف في الجهات الحكومية والسيارة والغسالة حسب المنصب والكرسي، ويقولون ان الحكومة انجزت 80 % من التنمية، طبعا لو انا اكدت على انها 80 % الشعب ما راح يصدق نتيجة اللخبطة الادارية والفساد الاداري، نعيش في عالم غلاء الاسعار وقلة انتاجية الموظف والزحمة بدون حل والقضية الاسكانية مبنشرة وهموم المواطن تزداد، للاسف البلد تحتاج الى مسؤولين أميين لكنهم مخلصين رجال وقت الشدة اصحاب قرار، نحتاج الى صفات الرعيل الأول في اعادة بناء الكويت أما مسؤولين فوفو ونونو ضيعوا البلد، كل نائب يصرخ ويهدد بالاستجواب يبي قريشات والكل يبحث عن مصلحته لكن ما في واحد من المسؤولين يدور مصلحة بلد «والله قهر» كل شي عندنا، فلوس عندنا، شباب عندنا، امكانيات عندنا، بس مو عندنا رجال الرعيل الأول.

أدعو الله أن يحفظ الكويت والله يصلح الحال اذا كان في الاصل فيه حال.