تذكرة السفر قبل كل شى يامواطن

بهالشهر المبروك زاد عدد الحضور بالديوانية .. ولايكون فى بالكم ان سبب هذا التزايد انه مافى دوامات وان الليل ستار حميد لايابيكم السر هو وقبل مااقول لكم خلونى اخطف كم نظره يمين وشمال لان مثل مايقولون من خاف سلم .. امرى لله يبه والسر عندكم بالامان المسئول عن هذا التزايد هو مواعين واطباق مالذ وطاب الرمضانية واللى الكل يتحرها من عام الى عام .. قال واحد من الشباب اللى حاضرين بصوت كله حزن والله طرطره والله حاله .. الامر اللى خلى الحضور ينتبه وكل واحد منهم يطالع اللى بجنبه معتقدين ان الكلام موجه لواحد منهم ..  قال ام العيال طلبت خدامه وبما ان طلباتها اوامر رحت لواحد من المكاتب اللى منتشره بالديره قبضتهم المعلوم واللى هو يتجاوز اكثر من نصف الراتب وانا اتحلطم من هذا السعر بس الواحد واشيقول امر ولازم يتنفذ واللا .. والله يستر من واللا راح اقعد بالبيت بروحى بعد لجوء المره سياسيا الى بيت اهلها .. المهم اخذت الخدامه وانا طاير من الفرحه الى المدام بعد تسجيلها .. هم بس يومين والفرحه انقلبت تعاسه اصبح علينا الصبح مالقينا للخدامه اثر ساعه ساعتين يوم يومين اسبوع .. رحت بلغت وسجلتها تغيب وهروب من منزل العبدلله وياليت الارض بلعتنى ولااقدمت على هذا العمل اللى خذا منى اللى دونى وراى اقصد قريشات ملابس العيد مالت (على) الجهال .. قال واحد من الحضور كمل واشصارلك .. جانى اتصال من الخدامه تبى جوازها والتنازل قبله وبين اخذ وعطا بالكلام عرفت عنوان البيت اللى هى فيه .. واول ماسكر الخط طرت لمخفر المنطقه وبلغته باللى صار .. قال حنا نجيبها بس بالاول ياحلو انت تجيب لها تذكره على الكويتيه علشان نسفرها بس يكون بعلمك ان تأخرت ترا بنسفرها بمعرفتنا وراح يكون سفرها على الدرجه الاولى وفلوس التذكره تلقاها بالكمبيوتر بأول مراجعه لك بمعامله .. قلت له حجى شرطى انت من صجك انا ماقط بحياتى ركبت طياره تدرى سجلها قضية ايواء .. رد على بكل اسف اللى تطلبه ماهو موجود بالقانون وانت لاتزعل نفسك ترا الضغط منتشر هاليومين بالبلد ويتخطف الشباب .. عقلتها وتوكلت على الحى القيوم وقلت فى عقل بالى يامواطن القانون ضدك وتراه مع الاجنبى اشتر التذكره بطيب نفس والله يخلف عليك وتعيش وتاخذ غيرها .. قال واحد من الحضور هذا حنا بالكويت كل شى ضد المواطن بس ياليتهم يشوفون اهل الخليج وقوانينهم يقولون ان اللى يلقون عنده خادم او خادمه متستر عليه يدفع ثمن جيبته لمعزبه المتضرر وفوق كل هذا يجيب تذكرت المغادره .. قال الجميع هذا القانون واللا بلاش من حلجك الى باب  السماء لعل وعسى جماعتنا ينصفونا شوى ومايضيعون حقنا لان اللى فينا مكفينا ويكفينا خرعت المبلغ المرصود للمصفاه الرابعه .
 
محمد خلف الشمري
[email protected]