من روائع الشاعر سليمان الهويدي:

الشاعر سليمان صالح على الهويدي رحمه الله، أشهر من نار على علم، له بصمة واضحة بالموروث الشعبي وأثرى المكتبة الشعرية في دواوينه وابداعاته وقدم الكثير من الشعراء الكبار عبر برنامج ديوانية شعراء النبط، وكان أحد مؤسسي البرنامج، ولعب دورا كبيرا في رقي تراثنا الشعبي، اخترنا لكم بعضا من قصائده الشهيرة:

(عشقت القمر)

عشقت القمر حيث القمر ينبعث به نور
واخــص الليالــي البـيـض تزهــاه ويزهـــنه

واحب الهوى لاهب من خايـع ممطور
وريـــح النفـــل حيث النـــفل طـــيب الخــنه

واحب الجماله والجماله عمل مبرور
واحـــب الغناة واعــز نفســـي عـــن المنه

واحب الصراحه والصراحه بها مسرور
حيــث ان الصـــراحه تقطـع الشك والظنـه

واحب الكريم اللي يفرج عن المعسور
اللــي من عطــى حتــى اهله مادرو عنه

واحب الرجال العارفه واكره المغرور
مــن اغـــتر في بـعض المظاهـــر يغــــرنه

سقا الله ليالٍ ماضيه قبل هدم السور
نـــحفر العــدود ونــشرب الماء من الشنه

نشوف البنات اللي وردن كنهم الحور
مـهــار مشاويــلن بالأعيــــاد مـــــعــــتنه

على الماء تشوف بيوتهم كنهن القور
كثـــير القـــبايل تــقطن الــعــد بــالكــنه

على البال ذكراها باليت الليالي تعود
يـــاليــت الـــليالي ماخــــذنـــــه يجيبنـه

تــذكر شـــيبانٍ لنا يوم حـــنا بــزور
يحثــــوننـا بالطــــيب والــفــرض والسنه

لو عاشوا حياةٍ قاسيه في بحر وبرور
عســـى الله يعــوضــهم بما فات بالجنه

لو دورٍ مضى من بينهم وين ذاك الدور
زمـــان مـــــضى لـــه ذكـــــريات يحلنــه

يوم الذهب مايلبسونه بدون خصور
جــمال النساء ماهو من السوق يشرنه

فقدنا حياة البدو مع شوفه المظهور
ولا عــاد بــه بــــدو ولا الطـرش له حنه

(دنيا رمتني)

الله من دنيا لدنيا رمتني
 دنيا معاليق الفوؤاد احرقتها

 امشي لها طوع ولا طاوعتني
 صبرت ماني عارف شاخرتها

 لا قلت ابرفع مستواي اخفضتني
وليا صفت لي ساعة كدرتها

ودي أصارحها ولا صارحتنى
ألم شوفاتي وهي فرقتها

من عقب ماني صامد بهذلتني
وكل الرموز الخافيات اعرفتها

ياقل حياتي بها وامحتني
واعذاري اللي تنطق شتتها

ما هي بعيد متنها حول منتي
لو نهتني باقصى حشاي اسمعتها

تصيبني غشوات لا قابلتني
وإن دنقت بقذيلتن وافهقتها

الله أكبر كنها مالكتني
تفرني كفرها لمنظرتها

أو خاتم في اصبعها لاعبتني
ان مت تتحمل خطاي ارقبتها

لاشتد غيظي يمها حايلتني
وكل الدموع الاولات امسحتها

بلعون فايقة الجمال اخلجتني
واعمري اللي ضاع على بختها

(رصيده ملايين)

لا واهني اللي رصيـده ملايين.. وامضـاه في راس القلم يقبلونه
وبواخــره تمشي بكل البلادين.. ومصـادره من كل شكل نمونه
وعنده عيال صالحين ورشيدين.. لا غــاب والدهم هم يمثلونه
وثلاث جارتٍ بناتٍ مزايين.. غيدٍ موفرٍ كل مايشتهونه
بيته يعانق شاهقات الضلاعين.. تلقى الحمام مبيض في ركونه
وديوانه أكبر ما بنى بالدواوين.. مفتوح واجـواد العرب يدهلونه
فيه الخدم متكـاملين ومطيعين.. من جاء لهالديوان بيباشرونـه
ولاصار بالريضان مثل البساتين.. ما طاب من ريضانهـا ينزلونه
تلقى الخزاما والنفل والرياحين.. تطرب له الورقا وتزعج فنونه
مع لابة تنطح وجيه الشياطيـن.. عزٍ لهم وهم يتفــادون دونه
لا خطب بنت مـا هلها معيين.. النــاس كلهم ودهم يناسبونه
هذي الحياة اللي لها الناس شفقين.. من غر منهــا يا حياة المهونه
أشوى من اللي ياخذ الدين بالدين.. وطلابته راس الشهر يبلشونـه
ومع الفقر عنده ابزور ونساوين.. يبون حـــاجتهم ولا يعذرونه
يقضي معاشه ما مضى الشهر يومين.. الفقــر شيب به وشيب عيونــه
عايش ولكن عيشة الفقر مسكين.. كنه مصخن وهو ما به اصخونه
يــا الله يا قابل صلاة المصلين.. انك تقوم بعونـنـا ثم عونـه

(الحظ)

حظي اللي كل ماقلت اعتدل
فيه كبوه مايبشر بالفلاح

 كل ماحاولت انهض به فشل
مثل هرش ثاوي وسط الأمراح

 أو كما ورع يخطى ما كمل
يقضبون ايديه وان هدوه طاح

والمعاذ الله عن فقد الأمل
لو رسب نبي نتفاول بالنجاح

والقناعة كنز وافر للرجال
ومن يطالع رزق غيره ما استراح

 اطرد الأوهام عنك والكسل
واعرف الدنيا من أولها كفاح

 لا تقول بالأمس يضرب بي مثل
انت ابن اليوم واللي أمس راح

 لا تخطي حرمة الناس وتزل
وكن على حقك أحد من السلاح

 والمقل يذل لو إنه بطل
كل هفواته تضيع مع الرياح

 وهالكلام هو الصحيح وبالفعل
مايطير الطير إلا في جناح

 والدراهم غطت عيوب الخبل
ارتفع صيته وهو مابه صلاح

 زلته لو انها كبر الجبل
اشطبوها عنه في كل ارتياح

 والرجال اللي لهم طيب وفضل
ذكرهم من مجتمعنا اليوم زاح

 واضحة بصماتهم فوق السجل
يوم وقت السيف الارخم والرماح

 جاهدوا لاجل الوطن جيش ورجل
بساعة حرجه يصيح بها الصياح

 ذكرهم قام يتلاشى وارتحل
صار ماضينا ورا ذاك السناح

 ول يا وقت التعاسه والدجل
مايعيش اللي يتعامل بالنصاح

 جاز للي لا حيا ولا خجل
كل شي يستوي عنده مباح

 والتكبر والغرور من الجهل
وغيبة الغافل هي الموت الذحاح

 لا تعرض نفسك لدرب الوحل
وكن حذر واحرص على الدرب السماح

 واجتمع بأهل التراحم والوصل
حيث رفقتهم تزيدك بانشراح

 واستعين بخالقك عز وجل
الله مايعطي من ايدين شحاح

 ثم صلى الله على اللي له نزل
عظمة القرآن ودون بالصفاح

(سلميلي)

سلميلي على الغالـي سـلام كثيـر
وصليها سلامـي ثـم قولـي لهـا
سلميلـي عليهـا عـد زول يسيـر
عـد ماهلـت القبـلـه هماليلـهـا
والله اني عليها اشفق من ام الغرير
عندهـا جاهـل تــوه يخطيلـهـا
مابقي من نماها كود ورع صغيـر
هو شريدة نماهـا مـن رجاجيلهـا
كل ماشافتـه فـي بيتهـا يستديـر
صفقت له وقـام الـورع يوميلهـا
عرضت ماعليها كود هـدمً قصيـر
والردايف مـن الاسـلاب ياويلهـا
ياخلف من غدا ليه عديـل النظيـر
لا تطالع هل النمـات فـي جيلهـا
لاتصدق بهرجً يالغضـي مايصيـر
العلـوم الرديـه وشتوالـي لـهـا
عين شيهانة شافـت حمـام يطيـر
تلت السبق والظلعـان تزمـي لهـا
تلت السبق واهوت وصط جو غزير
قـام صقارهـا يدعـي ويوميلهـا