بيت عن قصيدة للطلحي:

الشاعر عبدالله بن علي الطلحي الهذلي لقب بشاعر الحكمة، وله العديد من المشاركات الخليجية، وأصدر دواوين صوتية وديوان مقروء وشارك بأمسيات كثيرة في السعودية وخارجها، ومن قصائده الشهيرة:

يامتعب الشعار يابيت القصيد.. لولا تعبهم فيك ماجالك طراه
كم لي وانا ادور على معنى جديد.. ماكل من دور على الطيب لقاه
لو كل من يحذف حصاه يجيب صيد.. ماكان نحتاج البنادق والرماة
ولو ينصرف في البنك شيك بلا رصيد.. كلٍ طمع في الدر الأصلي وإشتراه
لعيون من يبحث عن الدر الفريد.. هذي وصاة لمن يحفظون الوصاة
يمكن ليا نصبت موازين العبيد.. ترجح بميزاني ويكتَب لي نجاة
أيامنا ماكلها فرحة وعيد.. وإن عشت يومك ماضمنت اللي وراه
والرجل مهما عاش في الدنيا سعيد.. لابد مايحتاج ربعه واقرباه
لاتقطع ارحامك ويشملك الوعيد.. ولاتخسر الغالي ولاترخص غلاه
واخوك لا تخسره لو إنه عنيد.. يخطي مية مرة وتسمح له خطاه
وإن كان شد الحبل حاول ماتزيد.. ارخه قبل الشد يوصل منتهاه
ولا تنصحه وقت الزعل مايستفيد.. واعرض عليه النصح في ساعة رضاه
وليا طلب رايك عطه رايٍ سديد.. وإن ماطلبك الراي لاتبحث خفاه
واعرف ترى قرب المنازل مايفيد.. واحيان يبدي شي ماودك تراه
لكن لاتقرب ولا تنزل بعيد.. خلك على قول المثل حذفة حصاة
واحفظ حبال الود حفظك للوريد.. اللي معلق فيه موتك والحياة
ترى الأخو مهما حصل يبقى عضيد.. وترى عيال العم ماعنهم غناة
الناس دايم ماتهاب اللي وحيد.. اللي ليا منه وقف محدٍ معاه
لو كان في الميقاف عزمة من حديد.. لابد بعض احيان ينزل مستواه
وخذ الحذر لو كنت في قصرٍ مشيد.. الذيب لولا فطنته كلٍ رماه
لاتامن الدنيا لها مكرٍ وكيد.. يمكن تحدك صوب شخصٍ ماتباه
إليا رمتك بوجه شيطانٍ مريد.. طاغي ومتمسك بقانون الطغاة
ثبت عليه شهود والخالق شهيد.. لا تندفع للشر وتسوي كماه
وإتبع دروب الحق عنها لاتحيد.. ويبين راعي العرف من راعي العياه
ولاتبدي اسرارك لزيد ولا عبيد.. من يحسدون الرجل في زاده وماه
لاجوك قول الله يدبر مايريد.. ولاتعرض الدعوة على غير القضاة
إلا على شيخٍ وله عقلٍ رشيد.. وإلا على مطنوخ له منصب وجاه

وقال أيضا:

معوّض خير ياحيٍ تهقوى في الزمـان ومـال..
سنينك لو رقيـت بعدلهـا يطرحـك مايلهـا

تعلّم وإعرف إن الدرب قدامك سهـل وجبـال..
جبـال تطولهـا وجبـال بعيونـك تخايلـهـا

ومعوّض خير ياحيٍ وردت الماء بدون حبـال..
يطول بك الوقوف وشربة المـاء ماتحصّلهـا

وقوفك عند راس البير مايسقيك لـو فنجـال..
ولاينفعك شوف الجمـه اللـي منـت طايلهـا

ومعوّض خير ياحيٍ خدعك من الرجال أشكـال..
تشوف أشكالها وتحطها أرفـع مـن منازلهـا

تعلّم من زمانك لاتصير مـن أجهـل الجهـال..
ترى في كل يـوم تجيـك عبـره لاتجاهلهـا

إذا ربي وهب لك عقل تلقى في الرجال رجـال..
تعرف اللـي يطلّـع قيمتـك واللـي ينزلهـا

ترى من بعض مايندي الجبين ويحرج الرجال..
لياسـاق الميانـه فـي نفـوسٍ ماتقبّلـهـا

ومهما شفت في صاحبك من نخوه وطيبة فال..
ترى بعض السجايـا كثـرة الإلحـاح يقتلهـا

معاريف الرجال ديون وديون الرجـال ثقـال..
لياصرت متعافي ليش تغـرق فـي جمايلهـا

رصيدك في حياتك سمعتك مع طيبيـن الفـال..
رجال الطيب والمعروف بالمعـروف عاملهـا

ولاتبدي بجاهـك فـي مقـامٍ مايسـر الحـال ..
ولاتشفـع لنـاسٍ ماتنومـسـك بفعايلـهـا

لياجاتك تعذّرهـا مـدام العـذر لـه مدخـال..
ووقت الجد قول إلها الصحيـح ولاتجاملهـا

وخذ منـي نصيحـه لاتصـدق كـل ماينقـال..
يجـرك للنميمـه ليـن يطرحـك بحبايلـهـا

يجيلك ناقـل النمّـات بهـروجٍ تغـث البـال ..
سوالف في قفاك وحظك أطيب يـوم تجهلهـا

يبـرر بالحميـه والصداقـه شينـة الأفعـال..
يجمّـل صورتـه بعلومـه اللـي ماتجمّلـهـا

ولو كانت حميه فيك رد المخطيه فـي الحـال..
ولاكان إستمعها فـي قفـاك وجـاك شايلهـا

ترى من جاب لك ودّى وهذي عـادة النقـال..
يحاول يقتنص من فمك كلمـه لأجـل ينقلهـا

ومثل ماقال عندك راح عنك وعند غيرك قـال..
وزوّد عشر فوق الكلمه اللـي كنـت قايلهـا

تجنّب مجلسه لاتجلس إلا مع كريـم خصـال..
تحمّـل ميلتـه وإن ميّلت ميلتـك ينقلها

ولاتصبر على الجار الردي لوهي ثلاث ليـال..
تضـرك جيرتـه لوكـان بيبانـك تقفلـهـا

وبيع الدار بأول سومةٍ تعرض علـى الـدلال..
ورزقـك عنـد ربٍ كاتـب اللقمـه وكافلهـا

وبنتك لاتزوجها الردي لوهـو كثيـر المـال ..
تربيهـا علـى الطـالات وتشـوّه سلايلهـا

وكم من لاش يرمي خيبة إبنه فوق راس الخال..
لوإن الخال من روس الرجال ومـن دلايلهـا

ليامنك عرفـت تميّـز الطيّـب مـن البطـال..
وفادتك التجارب في الحيـاة وفـي مسايلهـا

وكشفت الفرق مابين الصحيح وحيلة المحتـال..
وتعلمت الفراسه في الوجيـه اللـي تقابلهـا

بعد هذي ترى مالك غنى عن صحبة العقّـال..
يدلونـك بـرايٍ ينقـض الدعـوه ويفتلهـا

يقولون الرجال اللي سوالفهـم حِكـم وأمثـال..
ليامن ضاعت الحيلـه يـدل القـوم عاقلهـا

نصيحة واحدٍ جرّب وشاف من الزمان اهـوال..
يقدّم لـك خلاصـة هجـرةٍ جـرّب هوايلهـا