محنا لفو!!

سنه وشيعة، حضر وبدو، كل ابونا لهالبلد

خص الكاتب محمد الرويحل بتعليق على تصريح الشيخة فريحة الأحمد التي قالت فيه 'المتظاهرون والمشاركون في المسيرات مزدوجون ومندسون و(لفو) وليسوا كويتيين أصلاً ' ، وجاء في تعليقه مايلي :

(( قالت لفو ))
قالت لفو..
مو أصيلين .. مزدوجين
موكويتيين هذيلا هيلق ومندسين ..
يعني بالعربي المشرمح مو كفو ..
كلهم بدو .. يعني لفو ..
قلتوا كلونا البدو
وقلتوا جونا غزو
وصرنا بعيونج عدو
ومحنا كفو .. صرنا لفو ..
العفو ياشيخه العفو ..
يعني بالمشرمح قصدك بدو اهم اللفو ..
خليتونا مو من هالبلد ..
ومافيكم اللي زعل أو حتى أنتقد ..
ماقلتوا عيب هذيلا أهلنا
أهل البلد ..
مافيكم اللي لفعايلنا شهد ..
خليتونا لفو ..
ولديرتنا محنا كفو ..
العفو ياشيخه العفو ..
يعني قصدك بالمشرمح
صرنا غوغائيين ولفو ..
نسيتوا أيام الغزو ..
ودم الشهيد اللفو ..
وأم الاسير ومرته والأخو ..
وذاك الطفل اللي تربى بلا أبو ..
كل هذيلا صاروا بعيونك لفو ..
صاروا حشو ..
وين العقل
مو إحنا الأصل
وإحنا الفصل ..
وإحنا سور الوطن وقت الجلل ..
العفو ياشيخه العفو ..
خليتوا الشعب لعبه ولهو ..
صرنا سنه وشيعه ..
حضر وبدو ..
وصار اللي مو عاجبكم لفو ..
ضربتونا وقلنا العفو ..
شتمتونا وقلنا العفو ..
وسجنتونا وطلبنا العفو ..
وفوق هذا صرنا بعيونج لفو ..
إحنا ما بقنا البلد ..
وإحنا اللي حفظنا العهد ..
وإحنا اللي نصون الوعد ..
إحنا ياشيخه السند والسور لهالبلد..
إحنا الشعب ماحنا لفو ..
العفو يا شيخه العفو ..
إحنا الشعب ..
إحنا أذا أنجرح خد الوطن ..
بهذا الزمن ..
نشعل الدنيا غضب ..
إحنا الشعب ..
محنا لفو ياشيخه العفو ..
محنا حشو ..
ولا لعبه بايدكم ولا لهو ..
حنا سندكم لا تخلى عنكم الرخو ..
وحنا عصاكم اللي تضرب راس العدو ..
نرخص أرواحنا لأجل الوطن ..
هذي طبايعنا من زمن ..
قول وفعل ..
مو بس حجي ولعب ..
إحنا الشعب ..
محنا لفو يا شيخه العفو ..
يا شيخه لا يغرك خبل ..
ولا جاهل ورفيجه الطبل ..
هذيلا يا شيخه حشو ..
هذيلا للرخى ووقت اللهو ..
هذيلا مو قول وفعل ..
انتم صنعتوهم وخليتوهم أهم الاصل ..
وصارت لهم الكلمة الفصل ..
وإحنا صرنا بعيونكم بس لفو ..
العفو يا شيخه العفو ..
أسمعيها من محب ..
يعني بالمشرمح مو لهو ..
هاذي بلدنا غصب ..
وهذا وطنا غصب ..
إحنا الشعب ..
سنه وشيعه .. حضر وبدو ..
كل ابونا لهالبلد ..
عين وجسد ..
محنا لفو ولا احنا حشو ..
يعني بالمشرمح إحنا الشعب
والشيخه بلا شعب ماتصنع بلد ..
العفو ياشيخه العفو ..