قصيدة في بيت:

للشاعر الأمير محمد بن أحمد السديري رحمه الله قصائد خالدة، لاتزال تردد بين الحين والآخر، نختار منها القصيدة التالية والتي كان الشاعر يخاطب فيها ابنه خالد، يشكى له الحال من نكران الجميل والمعروف بين الناس

إن صار زود المال بيدين الأنذال..
حنّا من المعروف تندا يدينا

وان كانهم شرهوا على طيب الأفعال..
حنّا وردنا جمامها وارتوينا

وان فكّروا للجود يمشون رحّال..
حنّا قبل يمشون يّمه خطينا

يا ما لبسنا للشرف كل سربال..
وعلى البسيطة للفضيلة مشينا

في دوحة العربا لنا مجد وظلال..
وحنّا على در المكارم غذينا

لو نجمع اللي فات منا من المال..
كان شيدنا القصور وبنينا

نعطي ولا نتبع عطانا بالأقوال..
ونبذل ونسكت كننا ما عطينا

وان باعوا الشيمة بدينار وريال..
حنا دخلنا سوقها واشترينا

نطلع لها لو هي على روس الأقذال..
لو هو عسير ٍ دربها ما انثنينا

بافعالنا نرسم دروب ٍ للأجيال..
إلى نساها غيرنا ما نسينا

أسود سادات ٍ تسجل للأشبال..
فضايل ٍ شمنا لها واهتدينا

بيض ٍ نسجلهن جديدات وسمال..
حفايظ ٍ لأحفادنا اللاحقينا

نصبر على الشّدات لو شيلنا مال..
لو سال دم كفوفنا ما شكينا

نخاف يلقى سدنا كل ختّال..
ويبني هزيلات المعاني علينا

الليل يا خالد على والدك طال..
وهنّيت ناس ٍ بالكرا نايمينا

يا عز راسي شفت ما خبث البال..
شي ٍ يهوّل شيّب الجاهلينا

شي ٍ من أسبابه يشيب بالأطفال..
فطّر خشوم مهجرعات الحنينا

أدير قالات ٍ عريضات وطوال
قالات خلنّ المخفىّ يبينا

منهن رزين العقل بالوقت يهتال..
بوقت ٍ عبوس ٍ فطّن الغافلينا

وقت ٍ من أسبابه شكى كل ريبال..
نصبر ونسكت كننا غايبينا

الناس بالأيام راحل ونّزال..
وتفجعهم الدنيا وهم دالهينا

وحيات رب ٍ نزل آيات الأنفال..
عالم خفايا نية الحاقدينا

ما اترك طريق العدل في كل الأحوال..
لو يرحل المريخ للفرقدينا