فساد السلطة التشريعية غطى على الحكومة.. برأي محمد المُلا

الشاهد

المواطن... عايز حمير

محمد أحمد المُلا

 

المواطن الكويتي أو بالأحرى خلونا نقول المواطن البسيط شنو يبي من الحكومة؟ طلباته بسيطة، يبي مستشفى يعامله معاملة أوادم ويعطيه العلاج الصح، ويبي دكاترة على مستوى عالي، ويبي تعليم محترم، يبي تعليم يعلم عياله الدين بأصوله ويكبر العقول ويعطيه ثقافة صحيحة ثقافة تبني وطن وتبني دين وتبني علم ما تبني فتنة وطائفة.
المواطن الكويتي البسيط يبي الأسعار تتراقب من وزارة التجارة، يبي اسعار معتدلة وما يبي يأكل لحوم فاسدة، وشبابنا الزعلان يبي العدالة الاجتماعية تطبق على الجميع وعلى التاجر العود وعلى الشيخ وعلى الفقير، ليش التاجر السياسي لما يأزم الساحة السياسية يأزم بالملايين، إي نسيت أقولكم ما يرضى بالملايين يرضى بالمليارات، وليش يعطي العوائل أصحاب الدم الألماسي ويتعامل معاهم معاملة خاصة والقانون جدامهم نايم، المواطن الكويتي البسيط يسأل الحكومة ليش اللي يبوق بالملايين ما يتحاسب؟ كوهين ضيع 450 مليون دينار وحفظت القضية، وطوارئ الكهرباء كلوها تجار الكهرباء وطارت 500 مليون دينار، وأملاك الدولة تتوزع على الكبار، والفقير يبي بيت يسكن فيه، لا والله ما يبي بيت، يبي شقة تتكون من غرفتين وصالة ومطبخ يعيش فيه هو وعياله وأنا أقول ياحكومتنا صعبة؟ ياحكومة صعبة عليج تبنين بلد وتأمنين المستقبل وتطبقين القانون على الجميع، الصعب ياحكومة لما تزرعين مستشارين داخل الحكومة همهم تربيط العصاعص، وهمهم ينفعون أعمامهم ومعازيبهم وتياراتهم، وهمهم خراب هالبلد، هذه باختصار طلبات المواطن ياحكومة، أما طلبات المواطن لمجلس الأمة، لما أختار نواب ما أختارهم علشان يخربون البلد ويستجوبون علشان أرضاء المعازيب، وانقالت قبل، كل استجواب له ثمن.
وأسأل بعض النواب هل المسيرة مسيرة كرامة، احنا الكويتيين نستمد كرامتنا من وين ياكرامة، مو نستمد كرامتنا من الكويت، لأن الكويت هي اللي عطتنا الكرامة مو احنا اللي عطيناها الكرامة، الكويت أم الكرامة ما طلبنا من النواب يأزمون، طلب المواطن بس بناء وطن، اليوم السلطة التشريعية فسادها غطى على الحكومة، والمواطن يبي من النائب اللي مثله في مجلس الأمة أن يحافظ على القانون مو يدوس على القانون من أجل قبيلة أو مذهب، المواطن اليوم زعلان على حال البلد ومو راضي باللي يصير فيه.
وفي النهاية الكبار راح يبقون كبار، والمواطن يبقى مواطن ولكن أقول للمواطن كما تكونون يولى عليكم من نواب ووزراء، يمكن يانواب الأمة المواطن يطالبكم بحمير توفرون حمير، لأن بعض المرات الحمير مخلصين أكثر من الحمير في السياسة..
والله يصــلح الحــال اذا كــان أصــلاً فيه حــال.
والحافـظ الله ياكـويت.