سالفة وقصيدة، الشراري والطائرة

 الشاعر سليمان بن مطرود الشراري من سكان القريات في المملكة العربية السعودية، كتب قصيدة طريفة عبر فيها عن مشاعره بعد ركوبه الطائرة، قال فيها:

ودعت ناجح من مطار القريات..
يوم اركبونا الطائرة واشلعتنا

لفت ودارت وامرجت بين لحظات..
لولا المحازم الكراسي رمتنا

طاروا بنا حمر العلابي خواجات..
زغل العيون وجيههم هولتنا

تكفى تشهد يافهد واقرا الآيات..
الموت جانا والظروف اجبرتنا

جانا المضيف وقال وش في خدمات..
قلت نزلونا بطونا موجعتنا

من قبل أشوف الغيم من دون السموات..
واليوم أشوفه يافهد من تحتنا

عزالله إني ماحسبت الحسابات..
والا ترى سيارتي موصلتنا

يازين ممشى الأرض لو هي مسافات..
لو اننا بشعيب مجهزين قهوتنا

وش جابني للطايرة والمطارات..
والله ماعود ركوبها لو نزلتنا

لو تنفجر قامت تذيع المحطات..
رح عاد دور قشنا مع جثثنا

وبعد أن انتشرت القصيدة عبر الهواتف رد عليه أحد الشعراء من قبيلة عنزه بقصيدة قال فيها:

يامودع ناجح بمطار القريات..
 قصتك لو تضحك ترى حيرتنا

ياليت ماقالوا ترانا شرارات..
 ليت الخوي قال لخويه سكتنا

هذي قبيلة تنعرف بالشجاعات..
 كل(ن) تقول من القبايل غزتنا

بالطايرة لو مت من عرض من مات..
 ولاقلت ان الطايرة خوفتنا

بالطايرة خايف وبالقلب دقات..
 قلت العيون اللي تبينا بكتنا

لاتفتخر بالخوف وتسجل ابيات..
ولو انت ماسجلتها ماشمتتنا

الناس يابن الناس ترقا درجات..
 هذي تجارب وقتنا علمتنا

شف الشجاع اللي رقا بالطويلات..
 فوق القمر يحمل علم مملكتنا

سلطان ابن سلمان زبن الونيات..
اللي فعوله بالدول شرفتنا

هذا كلام الوايلي بالاشارات..
 يوم الشمالي قصته زعلتنا

والختم صلوا بسم رب السموات..
 على الرسول المصطفى خاتمتنا

وبعد أن وصلت القصيدة للشراري رد قائلا:

هذا حديـدٍ مـا يعـرف الشجاعـات..
ولهـو آدمـي وتخـوّفـه مرجلتـنـا

عنتر بلش بالثور صابه مخافات..
لا سالميـن مـن بلشتـه وابلشتنـا

يالوايلي لا تشك مـا بنـا مشكـات..
الآوادم كـــلـــهـــا عــارفــتـــنـــا

حنا نحب الضحك بالشعر وابيات..
لو قلت خوف الناس مـا صدقتنـا

كل ما سمعته بالقصيـدة دعايـات..
لا يصيـر شـك الطـايـرة خوفتـنـا

المرجلـه معنـا عليـهـا شـهـادات..
إن مــا شرينـاهـا تـراهـا شرتـنـا

لو ندعي بالخوف مزح وخرافات..
والحرب خبـه للجيـوش اجهلتنـا

إلى انسحب يرجع بقوة وهجمات..
لين العـدو ينحـاش مـن منطقتنـا

وان كان سلطان ارتفع للمجـرات..
قبلـه امريـكـا وروسـيـا سابقتـنـا

خل المحاور بيني وبينـك بالـذات..
لا تـدخـل الأمــار فـــي سالفـتـنـا